Líder karismátiku, Kay Rala Xanana Gusmão, rezigna-an husi ninia kargu hanesan reprezentante Governu Timor-Leste ba fronteira rai-maran no tasi Timor.
Eis prezidente Timorense, Kay Rala Xanana Gusmão rezigna ona husi kargu nu’udar reprezentante espesial Governu Timor-Leste ba prosesu fronteira marítima no dezenvolvimentu projetu petrolíferu Greaters Sunrise iha tasi Timor.
Eis komandante Falintil Em Chefe, Kay Rala Xanana Gusmão mos aprezenta nia rezignasaun ne’e liu husi karta ne’ebé haruka ba Primeiru-Ministru, Taur Matan Ruak, iha Sesta (10/7/2020).
Kontéudu husi karta ho pájina 2 ne’ebé GMN hetan asesu husi Lusa, hateten, Xanana nia rezignasaun refere ba desizaun partikular husi Governu ne’ebé anunsia ona hodi altera lideransa Timor GAP no ezonera prezidente, Francisco Monteiro.
Iha karta ne’e Xanana, hateten, nia rona remodelasaun ne’e liu husi média no hanesan sidadaun bai-bain, nia respeita ba remodelasaun estrutura Timor GAP bazeia ba desizaun husi Konsellu Ministru (KM).
Xanana afirma, nia sempre giadu husi prinsipiu teóriku katak, estrutura ida sei efikaz bainhira ema ne’ebé integra ba hatudu nia kapasidade iha nível no aspetu hotu, liu-liu kestaun sira ne’ebé toka klareza ba objetivu integridade pensamentu no kapasidade téknika ba persesaun matéria.
Fontes husi Governu informa ba Lusa katak, prezidente Autoridade Nacional Petróleo no Minerais (ANPM), Gualdino da Silva mos sei ezoneradu husi kargu ne’e iha tempu badak.
To’o momentu ne’e, Primeiru-Ministru, Taur Matan Ruak, la justifika dezisaun hodi ezonera Francisco Monteiro.
Kay Rala Xanana Gusmão reprezenta Governu Timor-Leste ba kestaun delimitasaun fronteira terestre no marítima ho Indonézia, maibe iha karta ne’e la refere ba kesatun ne’e. GMN
