GMN TV Politika CNRT: Pronúnsia uluk kandidatu antes PR anúnsia kalendáriu, falta étika polítika

CNRT: Pronúnsia uluk kandidatu antes PR anúnsia kalendáriu, falta étika polítika

Deputada bankada CNRT, Carmelita Caetano Moniz, hateten, partidu polítiku ka sidadaun ne’ebé atu kandidata-an ba Prezidente Repúblika (PR) tenke hein desizaun ka anúnsiu kalendáriu hosi Xefe Estadu kona-bá eleisaun. Tanba ne’e, deputada komisaun A ne’e konsidera, laiha étika polítika,  adianta uluk kandidatura bainhira Prezidente Repúblika seidauk anúnsia kalendáriu ba eleisaun nian.

“Realidade agora iha maluk balun kandidata ona nia an ba PR, nu’udar feto hau orgullu, iha feto ida ne’ebé brani  no fi’ar an loos atu kandidata an, nu’udar feto hau orgullu no apoiu. Maibe mezmu que feto ita orgullu, ejíze ita-nia feto maluk ne’e kumpri lei, kumpri prosedimentu sira, no mós tenke iha étika polítika, ida ne’e importante. Tanba señora ida kandidata-an ne’e, nia mós lori hela kargu Vise Preimeira Ministra ho Ministra Solidariedade Sosiál no Inkluzaun. Tuir étika polítika, ha’u la konkorda, tanba ema ne’e halo ona pre-kampaña, na realidade hau haree no asiste rasik katak, ema balun komesa uza ona kamizola ho imajen Sra Armanda Berta nia oin, ne’e pre-kampaña ona, ida ne’evíola tebes lei,klaru ke kona-bá kandidatura lei la bandu, maibe entermus étika ne’e ladi’ak, tanba ita uza hela sasán estadu ninian, se nune’e ita bele uza sasán estadu nian ba kualker interese.” deklara deputada opozisaun ne’e ba GMN iha PN, Kuarta (14/07/2021), bainhira husu kona-ba partidu KHUNTO, kandidata sira-nia Prezidente Armanda Berta ba PR, maske seidauk hetan anunsia kalendáriu husi PR, Francisco Guterres Lú Olo.

Xefe bankada PD, António da Conceição ‘Kalohan’ afirma, to’o agora PD seidauk bele pronúnsia nia kandidatu ruma, tanba respeita regras no kompetensia Prezidente Repúblika atu anúnsia uluk kalendáriu ba eleisaun.

 “Kandidatu ne’ebé aprezenta ne’e kuandu depois de PR dekreta kalendáriu, entaun baze ba ida ne’e, kandidatu sira bele hahu ona aprezenta an ou Partidu polítiku sira bele hahu aprezenta an.

Ba hau étika, tanba PR seidauk dekreta loloos ne’e seidauk bele, ami iha prinsípiu katak agora seidauk tempu atu ko’alia uluk kona-bá kandidatu se se, tanba primeiru tenke respeita mós funsaun órgaun soberanu sira nian, para PR dekreta uluk lai loron ba eleisaun, hosi ne’ebá mak foin bele dekreta kandidaturas”,realsa Sekretáriu Jerál PD ne’e ba GMN.

Maske nune’e, Prezidente komisaun A ne’ebé trata asuntu konstitusionais no justisa, Joaquim dos Santos subliña,sidadaun hotu iha direitu atu espresa nia kandisatura ba públiku, inklui pessoal ne’ebé assume hela kargu estadu nian,

Deputadu Fretilin ne’e mós deklara, bainhira seidauk ofisializa kandidatura iha Tribunal, seidauk bele suspende kandidatu nia mandatu ka kargu ruma estadu nian.

“Ne’e ema nia Liberdade de espresaun, ne’e ita atu bandu fali ka, se nia hakarak sai kandidatura ba PR, to’o dekretu PR dekreta ona kalendáriu eleisaun nian, nia tenke submete pedidu suspensaun, para bele kontinua. Maibe nia deklarasaun agora ne’e hanesan deklarasaun polítika, maibe atu suspende hein to’o Prezidente dekreta lai, ne’e nia deklarasaun polítika de’it, se mak atu konsidera ida ne’e. Se nia hatama ona nia pedidu kandidatura ne’e ba  Tribunal no ofisializa ona mak prosesu ne’e hahu iha ne’e. Nia hanesan sidadaun, hanesan ita ba merkadu faan modo ne’e, faan lai keta balun gosta karik, ne’e prosesu ida, se  ema gosta sosa, lagosta la sosa,

Mais ofisialmente hahu kuandu PR dekreta ona kalendáriu eleisaun ne’e, no periodu aprezentasaun kandidatura, ne’e hotu-hotu tenke ba iha CNE ona, maibe ida hanesan ne’e foin deklarasaun polítika de’it”,Deputadu FRETILIN ne’e salienta.

Ho nune’e, xefe bankada KHUNTO, Olinda Guterres, rekoñese KHUNTO mak adianta nia kandidatura, maibe la’ós ofisilamente, maibe foin pronúnsia internal ba partidu nia kuadru no militante de’it.

“Prosedimentu legal ami sei kumpri, maibe kandidatu ba PR nian hosi Khunto  ne’ebé deklara iha día 4 de Jullu iha sede nasionál ne’e, hanesan deklara de’it iha partidu polítiku ami nian rasik. Maibe prosedimentu legal ne’ebé iha ami sei kumpri, ami sei hato’o ba públiku katak, sei rejigna an hosi kargu sira ne’e mak foin bele fó sai ofisial iha públiku. Maibe oras ne’e dadaun , ami partidu polítiku ne’e ami nian, ami deklara ba ami nia ema, ami hakarak haree ami nia ema ne’ebé hosi munisípiu, ami hakarak haree ami nia forsa ne’e to’o iha ne’ebé, kandidatu ida ne’e mós la’os ami atu hadau malu ho maun sira nia poder ruma”,argumenta xefe bankada KHUNTO ne’e.

Prezidente Partidu KHUNTO, atúal Vise Primeira Ministra no Ministra Solidariedade Sosial no Inkluzaun, Armanda Berta, deklara nia kandidata ba Prezidente Repúblika períodu tinan lima mai, iha inaugurasaun sede  nasionál Partidu KHUNTO iha loron 4, fulan Jullu ne’e.

Enkuantu Partidu seluk to’o agora seidauk pronúnsia nia kandidatura ruma atu kompete iha eleisaun Prezidensiál tinan 2022.Say


Banner

Foto

Notisia Ikus

Variante Delta nafatin ameasa saúde públika, PR dekreta EE da-XVI

July 31, 2021
Xefe Estadu, Francisco Guterres Lú Olo, liu hos...

Velosidade internet lentu, AHDMTL husu MTK tau atensaun

July 31, 2021
Velosidade internet lentu ka neneik liu difikult...

Envolvimentu juventude iha ParPol importante

July 31, 2021
Envolvimentu  juventude iha aktividade Partidu ...

LH kestiona PN la envolve sosiedade sivíl iha diskusaun lei EOJF

July 31, 2021
Koordenadór La’o Hamutuk (LH), Celestino Gusm...

Governu aplika KO iha Ermera

July 31, 2021
Governu aplika ona Konfinamentu Obrigatóriu (KO...
1 2 3 623

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker