Deputadu bankada Partidu Unidade Dezenvolvimentu Demokrátiku (PUDD), António de Sá Benevides, hatete, nia la privatiza kadeira PUDD nian iha Parlamentu Nasionál (PN), tanba nia auzénsia iha PN tanba sei ba halo tratamentu saúde iha Indonézia.
Deputadu bankada PUDD, António de Sá Benevides iha plenária Segunda (12/07/2021) ne’e, retoma ona nia mandatu iha Parlamentu Nasionál (PN) hafoin halo tratamentu saúde kuaze fulan ida.
Relasiona ho kritiku hosi kuadru no militante partidu PUDD fó sai, atúal xefe bankada PUDD ne’e rezeita
Nia parte konsidera, deklarasaun kritiku sira hosi kuadru no militante partidu PUDD fó sai, hanesan fallansu internal partidu nian, tanba sei buka alternativa atu rezolve.
“Kona-bá ha’u-nia auzénsia ne’e ha’u halo tuir rejimentu de’it, se ha’u kontra karik Prezidente PN sei bele halo buat ruma, deputadu sira iha ne’e mós bele kestiona kona-bá ha’u-nia auzénsia. Ha’u ba halo tratamentu ne’e mós hetan rekomendasaun hosi médiku sira, Ministériu Saúde no Prezidente PN rasik. Kona-bá partidu nian ha’u la abandona, porque ha’u nia sekretáriu jerál rasik mai sai ha’u-nia asesór iha bankada PUDD, ami rua sempre halo konsultasaun. Partidu iha Sekretáriu Jerál ho Prezidente CPN sira-nia liman, la depende ba Prezidente mesak. Lójika mak ne’e, se sira identifika dehan 3 anos ha’u abandona partidu, nusa la iha primeiru ano no segundu ano la kestiona kedas, to’o ligasaun fali ho ha’u-nia auzénsia ida ne’e mak foin dehan ha’u durante ne’e abandona partidu. Ha’u ba fó posse iha Maubise, iha Aileu no fatin seluk ne’e la’ós abandona partidu. Iha rejimentu hateten dehan, durante auzénsia bele substitui, la’ós dehan tenke, maibe depende ba inisiativa deputadu. Maibe iha momentu ne’ebá ha’u laiha inisiativa, tanba la hatene ha’u-nia tratamentu ne’e atu to’o bainhira, ne’e lei mak fó hatene, ha’u mós la kontra lei ida, ita hotu la’o iha lei nia okos”,responde Deputadu PUDD António de Sá Benevides ba Jornalista iha PN, Segunda (12/07/2021).
Alénde ne’e, reprezentante povu hosi bankada PUDD ne’e mós kongratula estrutura foun PUDD nian, maske la rekoñese nia servisu durante tinan tolu hafoin PUDD hetan asentu.
“Ha’u hakarak fó kongratulasaun ba estrutura foun PUDD nian, informasaun ne’ebé kuadru sira fó sai, ha’u pessoalmente foku ha’u-nia esforsu no ha’u-nia enerjia tomak, atu kontribui ba dezenvolvimentu nasaun nian ne’ebé ita haree dadauk ne’e kompleksu teb-tebes. Entaun hau rezerva hau nia enérjia tomak para oinsa mak bele fokus liu ka konsentra liu ba dezenvolvimentu nasaun nian. Konferénsia ida ha’u-nia kuadru sira halo ne’e, ne’e direitu tomak sira nian, ha’u lakohi halo intervensaun ba ne’e”,dehan.
Iha Sábadu semana ne’e, kuadru no militante Partidu Unidade Dezenvolvimentu Demokrátiku, liuhosi enkontru alargada deklara ofisialmente Silvestre Xavier Sufa Efi sai nu’udar Prezidente interinu PUDD, hodi substitui António de Sá Benevides.
Deputadu PUDD ne’e ba halo tratamentu iha Ospitál Siloam, hahú hosi loron 03, fulan Juñu no fila hikas iha loron 30, fulan Juñu, tinan ne’e.Say
