GMN TV Politika Estensaun EE da-16 aprovadu iha PN ■CNRT rekomenda taka metin fronteira sira

Estensaun EE da-16 aprovadu iha PN ■CNRT rekomenda taka metin fronteira sira

0 views

Parlamentu Nasionál (PN) kinta lejislatura, liuhosi reuniaun plenária Komisaun Permanente aprova tan pedidu estensaun Estadu Emerjénsia (EE) da-16 ne’ebé haruka hosi Xefe Estadu Francisco Guterres Lú Olo, tanba  kazu foun COVID-19 variante Delta tama ona Timor-Leste (TL).

Reprezentante Xefe Governu, Ministru Prezidénsia no Konsellu Ministru, Fidelis Leite Magalhães, afirma, ho estensaun Estadu Emerjénsia ne’e mak bele fó podér ba Governu atu bele implementa medida sira prevensaun COVID-19 nian.

“Governu presiza duni halo Estadu Emerjénsia, sela’e ita laiha podér no kbi’it konstitusional atu bele implementa medida sira ne’ebé dalaruma limita ema sidadaun nia direitu, tanba ida ne’e lulik. Entaun buat ne’ebé Governu halo mak mai iha PN hamutuk ho ita bo’ot sira, hodi defende pontu tanba saida mak hodi husu tan PR atu extende”,afirma Fidelis, bainhira aprezenta Primeiru Ministru nia mensajen iha diskusaun ba pedidu estensaun EE iha PN, Tersa (27/07/2021).

Hafoin aprova pedidu estensaun EE ne’e, Prezidente Parlamentu Nasionál, Aniceto Guterres, informa, rezolusaun ba estensaun Estadu Emerjénsia ne’e, Parlamentu Nasionál halo konfirmasaun votu iha plenária estraordinária ne’ebé sei realiza iha fulan oin.

“Komisaun Permanente konvoka reuniaun extrardináriu ba konfirmasaun votus ba autorizasaun EE, sei hala’o iha día 10 de Agostu, regras mak obriga ita tenke halo konfirmasaun”,subliña PPN iha plenária.

Entretantu deputada bankada CNRT, Terezinha Viegas, liu husi deklarasaun polítika rekomenda ba Governu kontinua taka fronteira Timor-Leste nian, no tenke implementa pontu ida ne’e ho sériu atu evita variante Delta tama iha Timor-Leste no ikus mai da’et to’o nivel tranzmisaun komunitáriu.

“Tenke taka metin fronteira terrestre, aero, no marítima, hodi evita risku importa variante Delta mai iha Timor-Leste; Aselera ezekusaun ba Orsamentu Jerál Estadu 2021 ho montante Biliaun $2.1 ne’ebé Parlamentu Nasionál aprova iha tinan ida ne’e. Bankada CNRT lakohi rona katak orsamentu ida ne’e atu haruka fila fali ba kofre estadu, tanba Governu de Faktu husu orsamentu ida ne’e bazeia ba programa, no Bankada CNRT ezije atu Governu de Faktu implementa programa sira ne’e ba povu nia moris di’ak, hanesan Xéfe Governu de Faktu promete iha Parlamentu Nasionál bainhira aprezenta OJE 2021; Aselera pagamentu ba liña frente hanesan: membru PNTL no F-FDTL, Guarda Prizaun, médiku sira, enfermeiru, jornalista no ajente sira ne’ebé servisu direta iha luta hasoru Covid-19; Aselera pagamentu ba hotel sira ne’ebé uza ba kuarentena no izolamentu, nune’e mós aselera pagamentu ba emprezáriu Timoroan sira ne’ebé fornese servisu catering ba fatin izolamentu no kuarentena; Aselera pagamentu ba emprezáriu Timor-oan sira ne’ebé implementa ona programa sesta bázika, tanba oras ne’e kompañia lokál balun moris iha situasaun tusan nia laran; Aselera pagamentu ba emprezáriu sira ne'ebe kaer projetu emerjénsia husi inundasaun 4 de Abril ne’ebé to'o agora seidauk selu, embora projetu sira ne'e finaliza no uza tiha ona. Aselera lalais mós pagamentu ba reklamante sira ne’ebé seidauk simu pagamentu subsídiu familiar $200, tanba reklamante barak maka seidauk simu to’o ohin loron; Sosializa vantajen no risku vasina nian ho di’ak atu konvense povu hodi simu vasina, nune’e bele atinje lalais objetivu ba herd immunity ka imunidade rebanho”,dehan Terzinha Viegas.

Pedidu estensaun Estadu Emerjénsia ba dala-16 ne’e, passa iha reuniaun plenária komisaun permanente ne’e ho votus a-favor 18 kontra 0 no abstensaun 13.Say


Banner

Foto

Notisia Ikus

Governu prevee millaun USD 1.5 ba indemnizasaun SUA

October 27, 2021
Ministru Ensinu Superiór Siénsia Kultura (MESS...

Extensaun EE da-19 pasa, PN sujere labele limite movimentu populasaun

October 27, 2021
Parlamentu Nasionál (PN) aprova tan pedidu exte...

UDT apoia dada bee-moos ba komunidade iha Vatu-Vou

October 26, 2021
Partidu Uniaun Demokrátiku Timor (UDT), apoiu f...

KSDS-KE rekomenda PR haruka pedidu estensaun EE ba PN

October 26, 2021
Xefe Casa Civíl Prezidénsia Repúblika, Franci...

Kandidatu ajente administrasaun 93 “kesar” MEJD ba PN

October 26, 2021
Kandidatu Ajente Administrasaun (AA) 93 ne’eb...
1 2 3 656

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker