GMN TV Politika PN ezije Governu responde povu nia halerik durante pandemia

PN ezije Governu responde povu nia halerik durante pandemia

3 views

Reprezentante povu sira iha Parlamentu Nasionál (PN) ezije Governu atu responde povu kiik nia halerik no susar ne’ebé sira enfrenta impaktu hosi pandemia COVID-19 no situasaun atuál rai-laran nian ne’ebé implika ba ekonomia la’o la efikasia.

Xefe bankada PD, António da Conceição ‘Kalohan’, afirma, situasaun atuál ne’ebé lori ona povu Timor-Leste hakat to’o Estadu Emerjénsia ba dala-16 halo povu ki’ik nia moris sai difísil liutan, tanba sírkulasaun ekonimia rai laran la estavel.

Reprezentante povu ne’e observa, estrada protokolu sira hafutar ho vendedór ai-leba,  diferente tebes kompara ho situasaun anterior, tanba  halo inan ho labarik ki’ik-oan sira, ferik no katuas, joven sira hili lata mamuk, faan ai-funan, fa’an animal maus sira leba tun sa’e iha Díli laran, fa’an ai-fuan haleu Díli no raut rai-henek, hodi sustenta nia moris lor-loron.

Situasaun ne’e akontese, tanba sidadaun barak lakon nia servisu, sirkulasaun ekonomia la la’o, limite  movimentu sidadaun nian no seluktan.

Membru Parlamentu Nasionál ne’e sente triste liutan, bainhira haree inan isin-rua sira tun direta ba mota-laran hodi piñera rai-henek.

Relasiona kondisaun atuál ne’ebé povu hasoru, deputadu PD ne’e husu  Governu atu halo intervensaun ba povu vulnerável sira.

“Estadu Emerjénsia ho Serka Sanitária ne’e iha efeitu pozitivu, maibe susar liu mak efeitu negativu ne’ebé kauza hosi  medida polítika sira ne’e, hatodan tebes povu. Populasaun barak, liu-liu inan-feton sira mak simu liu todan ida ne’e, inan feton barak mak agora hili kalen mamuk iha fatin-fatin, hodi faan no buka netik foos kilo ida ba sira nia família. Estrada prinsipal iha sentru da kapitál ne’ebé besik loos ba Palásiu Governu hahú hafutar ho vendedór animal iha Estrada ibun sira, kesi fahi, kesi manu no seluktan, vendedór ai-funan sira, ai-leba ai-funan no ai-fuan sira hotu mak halo movimentu iha Estrada prinsipal sira. Bankada PD hanoin Governu iha meius no rekursu atu halo intervensaun ba hakmaan povu nia terus. Governu liuhosi MSSI tenke ativu halo asaun sosiál, hodi fahe netik foos kilo ida ka rua ba povu kbi’it la’ek sira. Tenke halo atuasaun ba merkadu, hodi redus nesesidade bázika nia folin, hodi apoiu kapasidade kompra populasaun sira nian”,sujere reprezentante povu ne’e iha PN semana ne’e.

Nune’e mós xefe bankada UDT, Francisco David Carlos, reforsa, povu Timor-Leste, terus demais liu ona, tanba husu ukun nain sira atu rona netik povu nia halerik, hodi ezekuta ho máximu no lalais ba Orsamentu Jerál Estadu no orsamentu retifikativu ne’ebé Parlamentu Nasionál aprova ho karaktér urjénsia.

Reprezentante povu ne’e lamenta, oitavu Governu sempre husu Parlamentu Nasionál atu aprova orsamentu hotu ho urjénsia, maibe lentu no la reflete karaktér urjénsia ne’e iha ezekusaun.

“Povu lakohi rona ita-nia deklarasaun, maibe povu hakarak ita nu’udar reprezentante povu, nai ulun sira ka’er ukun ne’e, hatudu netik sinál esperansa de vída ba sira ho situasaun COVID ida ne’e. Povu Timor terus demais ona, sira mós hakarak moris di’ak, dalaruma ita iha laletek a’as ba hateke tun mai la hetan, matan talvez mós át, dalaruma ita iha baki laran, ita mós diuk la rona povu nia halerik, maibe ba interese nasionál ita hotu tenke hamutuk para responde”,subliña deputadu David Carlos.

Iha biban hanesan, deputada Komisaun C ne’ebé trata  finansa públika, Fernanda Lay, kontinua ezije Governu atu aprezenta relatóriu ezekusaun fundu COVID ba Parlamentu Nasionál, nune’e Parlamentu bele hatene progresu hosi ezekusaun refere.

“Governu la fó relatóriu fundu COVID, haruka relatóriu gasta osan 65 ezemplares, ami komisaun permanente ne’e 32 de’it, gasta osan saugati de’it, ida ne’e laiha uzu ida, ami hakarak relatóriu ezekusaun”,ezije deputada CNRT ne’e.

Orsamentu Jerál Estadu ba tinan 2021 ne’ebé Parlamentu Nasionál aprova ho montante billiaun USD 1.895, hafoin ne’e Parlamentu Nasionál mós aprova tan Orsamentu Retifikativu  ba kategoria tolu, ba  fundu kontijénsia, fundu COVID no fundu infraestrutura.

Iha Orsamentu retifikativu, Parlamentu Nasionál aprova montante tokon USD 287 ba fundu COVID.

 Ba fundu infraestrutura, tokon USD 280 no ba fundu kontijénsia hamutuk tokon USD 65.

Tuir portal transparénsia, to’o fulan Jullu ne’e, ezekusaun Orsamentu Jerál Estadu atinje ona 36.5%.Say


Banner

Foto

Notisia Ikus

UDT apoia dada bee-moos ba komunidade iha Vatu-Vou

October 26, 2021
Partidu Uniaun Demokrátiku Timor (UDT), apoiu f...

KSDS-KE rekomenda PR haruka pedidu estensaun EE ba PN

October 26, 2021
Xefe Casa Civíl Prezidénsia Repúblika, Franci...

Kandidatu ajente administrasaun 93 “kesar” MEJD ba PN

October 26, 2021
Kandidatu Ajente Administrasaun (AA) 93 ne’eb...

CNRT “deteta” artigu balu iha LEO inkonstitusionál

October 26, 2021
Deputada bankada CNRT, Fernanda Lay, deteta, pro...

JFP-ADDD: Jornada polítika iha TL la tuir K-RDTL

October 25, 2021
Movimentu Junta Forsa Polítika Aliadu Defende D...
1 2 3 655

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker