Prezidente Repúblika (PR), Francisco Guterres Lú Olo, fó posse ba embaixadór na’in lima (5) ne’ebé sei reprezenta Timor-Leste (TL) hodi hala’o misaun iha nasaun lima. Tanba ne’e, Xefe Estadu husu ba embaixadór sira hotu atu kontinua promove hari’i no haburas relasaun amizade no koperasaun entre Estadu hotu-hotu.
Embaixadór sira ne’ebé hetan posse kompostu husi, Carlito Nunes, ba postu ho karater multilaterál iha misaun permanente Organizasaun Nasões Unidas, Eusebio Corsino, ba postu ho karater bilaterál iha Repúblika Cuba, Abel Guterres, ba Estadu Brunei Darussalam, Adão Soares Barbosa ba enviadu espesiál, ho kategoria embaixadór itinerante ba asuntu klimátiku, no Falicidade Guterres, Embaixadóra Timor-Leste ba Nova Zelandia.
“Governu no Prezidente Repúblika fó fiar ba ita bo’ot sira atu serbisu hamutuk ho país no organizasaun sira ne’ebé ita bo’ot simu akreditasaun ba, nune’e relasaun bilateral no multilateral entre ita nia eEstadu no Estadu sira seluk hametin liu tan. Artigu 6 konstituisaun RDTL hatete katak entre hakarak seluk ita nia objetivu prinsipál mak promove hari’i no haburas relasaun amizade no koperasaun entre estadu hotu-hotu. Ha’u fiar katak ita bo’ot sira iha kondisaun atu hasa’e no haluan liu tan nível no ámbitu koperasaun ida ne’e”, Prezidente Repúblika, Francisco Guterres Lú Olo, hato’o iha ninia diskursu seremónia tomada de posse ba embaixadór sira, iha Palásiu Prezidensiál Bairo-Pite, Tersa (13/07/2021).
Vise Ministru Negósiu Estranjeiru no Kooperasaun, Julião da Sílva, hateten, embaixadór sira ne’e dezignadu ba nasaun lima ne’e tuir planu sei desloka iha fim fulan Jullu hodi ba hala’o misaun.
“Designadu ba iha ba Nova-Zelandia, ba iha Brunei Darusalam, reprezenta iha ONU, reprezenta mudansa klimátika, no sira na’in lima sei reprezenta ita nia estadu iha tempu badak ita espera katak semana hira mai tan bele hetan posse, normalmente ba hala’o misaun durante 3 anos no dezempeñu di’ak bele kontinua”.
Embaixadóra Designada TL ba Nova-Zelandia, Felicidade Guterres agradese ba fiar ne’ebé Estadu Timor-Leste fó hodi reprezenta nasaun TL iha Nova Zelandia.
Felicidade Guterres hateten, nasaun nova zelandia importante ba Timor-Leste, tanba iha ona koperasaun di’ak no durante ne’e fó apoiu ba nasaun no povu TL iha área oi-oin.
“Ha’u embaixadóra designada ba nova zelandia ha’u sente agradesidu tebes, tanba bele hetan konfiansa atu asumi knar hanesan embaixadóra bad ala rua agora, tanba uluk ha’u iha kambodia ha’u fila fali mai tinan 1 ho balun ona no agora ha’u asumi knar embaixadóra bad ala rua no ha’u sente agradesidu tebes, tanba bele hetan konfiansa husi PR, governu no MNEK hodi asumi knar”.Ina
