GMN TV Politika Promesa selu USD 10.000 kauza husi vasina, PD konsidera Governu halo negósiu ho vida sidadaun

Promesa selu USD 10.000 kauza husi vasina, PD konsidera Governu halo negósiu ho vida sidadaun

5 views

Xefe bankada Partidu Demokrátiku (PD), António da Conceição ‘Kalohan’, propoin ba Governu ne’ebé lidera husi Primeiru ministru, Taur Matan Ruak, atu halakon tiha promesa ne’ebé atu fó kompensasaun USD 10.000 ba sidadaun ne’ebé mate kauza husi vasina, tanba desizaun refere hanesan halo negósiu ho sidadaun nia vida.

Tuir deputadu opozisaun ne’e, Governu uza de’it autoridade no kompeténsia hodi konvense populasaun, la’ós ho promesa falsu sira ne’e.

“Se bele konsellu ministru deside fila fali kona-bá lotária ne’e ita kopia programa rai seluk nian, hanesan agora dadaun lotaria ba ema ne’ebé simu vasina ne’e, undian berhadiah oan ne’e, di’akliu apaga tiha. Tanba ne’e hanesan enfrakese autoridade Governu nian atu konvense ninia populasaun, ao mesmo tempu atu hola responsbailidade Estadu hodi proteje nia sidadaun rasik, ne’ebé buat sira hanesan ne’e ladun di’ak ba ita no ba nasaun ida enkuantu mais ki’ak hela, ita sei hanoin tan buat lotária ne’e ba ema ne’ebé simu vasina. Mais piór liutan kuandu dehan mate tanba vasina selu USD 10.000, ida ne’e hanesan ita komersializa saúde ne’e, ou entaun ita ne’e mak laiha liu autoridade atu impoin ba governu, se bele governu hasai tiha ka desmente tiha buat ida ne’e, para labele iha nafatin espetativa ida ne’ebé mak ladun di’ak, Ita hakarak atu ita-nia povu mós mantein respeita Governu”,sujere deputadu António Da Conceição ‘Kalohan’ liuhosi intervensaun iha plenária, Segunda(13/07/2021).

Alénde ne’e, deputada CNRT, Maria Barreto kontinua ezíje Governu, atu kumpre promesa, hodi fó kompensasaun USD 10.000 ba família matebian Hilária de Jesus, tanba Hilária de Jesus mate hafoin simu vasina tuir promesa Governu nian antes ne’e. Tanba ne’e, husu Governu tenke rekoñese matebian Hilaria de Jesus mate tanba vasina AstraZeneca.

“Governu deklara Hilária ne’e la’ós mate tanba vasina, oinsa Governu bele deklara dehan Hilaria de Jesus mate la’ós tanba vasina, sera que ita bo’ot sira halo análiza laboratóriu ruma mak hodi deklara dehan katak nia mate la’ós tanba vasina? Relatóriu hosi ekipa jestaun krize hosi Bobonaro hatudu momoos, impaktu hosi vasina, tanba antes nia simu vasina iha teste ba nia tensaun, no husu nia alerjía ruma mas laiha, depois de nia simu vasina AstraZeneca ne’e mak foin akontese ida ne’e. Ne’ebé ita atu mai nega tan fali ida ne’e, atu nega dehan la’ós impaktu hosi vasina razaun hosi ne’ebé? Ema strok tanba vasina mós ita dehan katak ne’e la’ós impaktu hosi vasina, dehan fali tanba moras komplikasaun, ema simu vasina mak mate mós ita nega. Oinsa ho deklarasaun hosi Governu ne’ebé mak fó sai ba públiku, ema mate tanba vasina tenke selu USD 10.000, agora USD 10.000 iha ne’ebé, selu ona ka seidauk, la’ós lori fali osan lilin nian mak ba fó matebian nia família, tanba ne’e mak iha relatóriu ne’ebé mai ne’e hatudu matebian nia família la koopera, tanba mate hakoi ona mak foin lori osan lilin nian ba, mas antes ne’e iha aproximasaun entre Governu lokál ho família matebian ba iha prosesu sira hotu, tanba ne’e mak husu ne’e, razaun iha ne’ebé mak nega ne’e, se bele lori ona USD 10.000 ba entrega ona ba família matebian sira, para rezolve problema ne’e”,kestiona deputada opozisaun ne’e.

Iha loron 23, fulan Juñu, portavoz Oitavu Governu, Ministru Prezidénsia no Konsellu Ministru Fidelis Magalhães, afirma, Governu sei fó kompensasaun osan ho valór rihun 10  ba sidadaun ne’ebé mate tanba vasina no sei kompensa mós inkapasidade ne’ebé provoka hosi vasina COVID-19.

Hafoin ne’e, iha loron 30, fulan Juñu, tinan ne’e, abitante  Hilária de Jesus hosi Suku Lour munisípiu Bobonaro mate hafoin oras ida simu vasina AstraZeneca, maibe to’o agora Governu seidauk kumpre promesa hodi fó kompensasaun, tanba Governu la rekoñese motivu hosi matebian Hilária nia mate tanba vasina AstraZeneca.Say


Banner

Foto

Notisia Ikus

Governu sei dezenvolve Sentru Agríkola Quinta Shalom Farm Hera

September 20, 2021
Primeiru Ministru (PM), Taur Matan Ruak, hatete,...

PN haree Governu book-an “maten liu” antisipa dezastre naturais

September 20, 2021
Parlamentu Nasionál (PN) haree Governu book-an ...

Vizita izolamentu Lahane, PM Taur rekomenda pontu importante tolu

September 20, 2021
Primeiru Ministru (PM), Taur Matan Ruak, hala’...

Konta deit istória, sai dezafiu ba konstrusaun Estadu

September 19, 2021
Sekretáriu Jerál Partidu Uniaun Demokrata Timo...

CNRT seidauk iha kandidatu ba PR

September 19, 2021
Komisaun Polítika Nasionál (KPN) Partidu CNRT,...
1 2 3 641

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker