Primeiru Ministru (PM), Taur Matan Ruak, hatete Timor-Leste iha priviléjiu boot halo kooperasaun ho Estadu Unidos Amerika (EUA), tamba Timor nu’udar nasaun ki’ik, maibe iha konfiansa ho EUA hodi konsolida, sustenta iha valór prinsipiu ne’ebé komunga, demokrasia, direitu umanu ne’ebé sosa ho ran no ruin.
Xefe Governu hato’o lia hirak ne’e iha serimonia hatuur fatuk dahuluk ba konstrusaun konjunta Aeródromu Baucau, Segunda (12/07), iha aeroportu Baucau.
Taur Matan Ruak mos rezeita informasaun ne’ebe fó sai hosi Ativista Pro RDTL, katak konstrusaun aérodromu ne’e atu Estadu Unidos Amerika uza ba ninia base militar iha Timor- Leste.
“Ne’e la los kuandu espekulasaun barak hanoin katak, Estadu Unidus Amerika (EUA) atu mai halo baze iha ne’e, hau ho Jenerál Lere militár tinan barak ona ne’ebé la presiza halo Baucau sai baze ba nasaun ida ne’ebé poténsia militár iha mundu, tamba ne’e Baucau la presiza sai baze, ne’e ba ema sivil mak dehan Baucau presiza sai baze, tamba ne’e la los, mas ne’e parseria ida hau apresia parseria ho EUA hanesan Primeiru Ministru no Eis Jenerál “, hatete Xefe Governu
Taur Matan Ruak esplika kooperasaun Estadu Unidus Amerika (EUA) ho Timor-Leste ne’e, hanesan previlejiu bo’ot, Tamba Timor- Leste nasaun kiik iha koopersaun diak ho Amerika.
“Kooperasaun EUA ne’e hanesan previlejiu bo’ot ida ,laiha país hanesan Timor-Leste iha mundu nem todos país kiikuan hanesan TL, mak iha previlejiu iha kooperasaun ho EUA , hau haree iha fatin barak iha mundu parseria ho EUA nasaun oituan, mas kuandu iha parseria tamba iha konfiansa ita ho EUA, ita konsolida sustenta iha valores prinsipiu ne’ebé ita komunga hanesan demokrasia direitus humanus ne’ebé ita rasik mak lori ran mak sosa, terus mak sosa ema la fo ba ita iha bandeza”, hatete Primeiru Ministru.
Iha oportunidade ne’e, Xefe Governu husu ba Prezidente Autoridade Munisipál, Xefe suku no Aldeia sira atu apoia no komunika ba komunidade atu koopera ba dezenvolvimentu.
Hatúr fatuk dahuluk ba konstrusaun konjunta Aeródromu Baucau
Primeiru Ministru no Ministru Interior, Taur Matan Ruak, Embaixador Estadus Unidus Amerika (EUA), iha Timor-Leste, Kevin Blackstone, Xefe Estadu Maior Jenerál F-FDTL, Tenente Jenerál, Lere Anan Timur, hatur fatuk dahuluk ba rehabilitasaun konjunta Aeródromo iha Baucau Vila, Munisípiu Baucau, Segunda (12/07/21).
Xefe Governu ne’e hatete, ho envolvimentu Estadus Unidus Amerika nia armada Aérea, Timor-Leste iha futuru diak, tamba F-FDTL iha ona komponente Aérea, nune’e presiza aeroportu ida ne’ebé ho kondisaun diak.
Antes ne’e, Vise Primeiru Ministru no Ministru Planu no Ordenamentu, José Maria dos Reis, Estadus Unidus Amerika, ne’ebé reprezenta husi Embaixadór Kevin Blackstone, asina nota entendimentu,atu halo rehabilitasaun konjunta ba Aérodromu Baucau inklui apoiu potensiál ba aviasaun sivíl.
Objetivu husi akordu ne’e, atu ajuda dezenvolve programa promove dezenvolvimentu ekonomia no diversifika aérea aviasaun sivíl, ne’ebé sei finansia husi Ministériu Defeza no Estadus Unidus Amerika, ho alokasaun orsamentu millaun USD 10.Tos
