GMN TV Politika Xanana Gusmão: DERROTA IHA ELPAR, SAI LISAUN BA KUADRU PARTIDU

Xanana Gusmão: DERROTA IHA ELPAR, SAI LISAUN BA KUADRU PARTIDU

0 views

Prezidenti partidu CNRT, Kay Rala Xanana Gusmão, informa, CNRT derrota iha Eleisaun Parlamentar (ElPar) tinan ne’e,  sai lisaun bo’ot ba kuadru partidu nian atu haluan sira-nia koñesimentu hodi servi povu ho diak liu.

“Dever ha’u nian nu’udar Prezidenti partidu atu kuidadu imi, atu hadia imi nia hanoin no hadia imi-nia koñesimentu atu povu bele iha konfiansa. Ita labele dehan, partidu ida ne’e atu para, sei la para. Ida ne’e mak ha’u sei eziji ba imi atu hanoin, estuda no aprende, tanba ha’u haree imi hasai tiha S1 no S2, imi baruk ten,” dehan Xanana Gusmão, iha nia diskursu ba loron ikus konferensia CNRT nian ne’ebé hala’o iha Centro Convenções de Dili, Domingu (06/08). Xanana mós agradese, ho konferensia CNRT nian durante loron tolu ne’e, konferensista sira konsege detekta no deskobre problema saida mak halo CNRT lakon iha eleisaun parlamentar tinan ne’e. Xanana afirma, partidu nia esensia la’os atu buka sa’e ba poder, maibé partidu nia esensia atu responde ba nesesidade povu nian, hodi aprezenta programa atu hadia. Nia hatutan, iha kongresu nasionál CNRT nian foin lalais ne’e mós ko’alia ona katak iha tinan hirak mai ne’e sei iha tempu atu hadia partidu, no atu haluan kuadru partidu sira-nia koñesimentu atu bele servi nafatin partidu ne’e ho diak. “Partidu ida so bo’ot la’os katak tanba ema, maibé partidu bo’ot bainhira kuadru partidu nian tomak bele hadia sira-nia koñesimentu, no haree ba prosesu husi anglu ka sudut hotu,”katak Xanana. Tanba ne’e, Xanana dehan, kuadru partidu CNRT tenki hetan formasaun polítika atu hatene no loke luan kuadru sira-nia hanoin kona ba polítika iha rai laran. Tuir Xanana, formasaun polítika ho jestaun ne’e la’os ba de’it jestaun finanseiru, maibé jestaun lideransa no polítika, tanba nu’udar kuadru polítiku, tenki sai lider ida ne’ebé diak. “Treinamentu ba lideransa ne’e, atu haree ba jestaun tanba  parte importante ida iha kbi’it lideransa nian, jestaun hanoin ema barak nian ne’ebé diferente, jestaun tristeza no kontentamentu,”dehan Xanana. Xanana mós rekoñese, povu rai ida ne’e, la fiar ona ba figura maibe haree ba program, planu no asaun konkreta. “Ita nia povu hatudu ona katak, sira lafiar ba figura ida, realidade mak hatudu ona ne’e, povu persiza lider husi kuadru partidu. Ha’u-nia obrigasaun prepara imi atu kaer nafatin partidu ida ne’e atu lori ba oin, ho konfiansa no kbi’it tomak,” afirma Xanana. Tanba ne’e, Xanana dehan, nia sei lidera debate ida ho kuadru partidu CNRT tomak, kona ba área hotu iha Timor Leste, inklui mós rekursu umanus. “Ha’u sei la eziji ba kuadru ida-ida atu hatene buat hotu, maibé sei husu ba kuadru hotu atu kompriende buat hotu,”tenik Xanana. Nia salienta, iha tinan 10 nia laran ne’e, partisipasaun CNRT nian la’os de’it iha Governu, maibé mós iha Parlamentu Nasionál, kuadru ka membru sira husi CNRT iha difikuldade. Tanba ne’e, Xanana dehan, iha tempu ne’e mós, tenki fó atensaun barak liu ba deputadu sira, hodi hadia kualidade diskusaun iha Parlamentu Nasionál. “La’e ema haree iha televizaun, sira hatete mai katak, maun, ida ne’eba ne’e asal bunyi de’it. Ita tenki kuriji ida ne’e, no partidu mak tenki simu responsabilidade ida ne’e atu eduka no forma nia deputadu sira atu ko’alia,”katak Xanana. Iha Governu nia laran mós, Xanana detekta katak, durante tinan 10 ne’e, hatudu katak, membru Governu sira la koñese asuntu hotu. Iha ElPar tinan ne’e, partidu FRETILIN mak sai primeiru vensedor, tuir kedas CNRT, no PLP iha terseiru lugar, PD, no KHUNTO ba dala ikus ne’ebé hetan asentu parlamentar. Iha andamentu polítika ne’ebé la’o oras ne’e dadauk, Partidu CNRT ne’ebé lidera husi Kay Rala Xanana Gusmão ho PLP lidera husi eis Prezidenti Repúblika, Taur Matan Ruak deklara ona katak, sira prefere ba deit opozisaun no PD ho KHUNTO sei hein kontaktu husi Partidu FRETILIN ne’ebé hetan mais votado iha ElPar ne’e oinsa atu forma VII Governu.cos


Banner

Foto

Notisia Ikus

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...

Governu kontinua propoin PR renova EE da-19

October 21, 2021
Konsellu Ministru (KM) iha reuniaun Kuarta (20/1...

Movimentu livre iha finadu, Governu apela sidadaun “tenke” vasina

October 21, 2021
Ministru Prezidénsia Konsellu Ministru (MPKM), ...

MOP la realiza ninia promesa

October 20, 2021
Ministériu Obras Publikas (MOP), Diresaun Nasio...
1 2 3 653

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker