GMN TV Politika PR SEI TERMINA LORON POSE BA KANDIDATU MEMBRU GOVERNU ■HORTA: LABELE FO ULTIMATU BA PR

PR SEI TERMINA LORON POSE BA KANDIDATU MEMBRU GOVERNU ■HORTA: LABELE FO ULTIMATU BA PR

0 views

Primeiru Ministru (PM), Taur Matan Ruak, kontinua diálogu ho Prezidenti Repúblika (PR), Francisco Guterres ‘Lú olo’ kona-ba lista kandidatu membru Governu nain 9 ne’ebé seidauk simu pose, enkuantu kona-ba kandidatu membru Governu nain 3 seluk ne’ebé hetan resposta husi Xefi  Estadu  atu simu  pose, seidauk termina loron ba pose ninian.

“Enkontru ho Prezidenti Republika ami informa kona-ba Orsamentu Jeral Estadu  no atividade sira ne’ebé Governu hala’o, no koalia mos kona’ba Ministru sira ne’ebé seidauk simu pose, no Prezidenti Repúblika sei aranza tempu para fo pose ba sira nain 3 tamba sira la iha problema,  kuandu marka ona loron ita bo’ot sira sei hatene,”dehan PM Taur, ba Jornalista sira, Kinta (09/08/2018), hafoin remata enkontru ho Prezidenti Repúblika iha Palasiu Prezidensial Nicolau Lobato Bairo Pite Dili.

Horta: Labele fo ultimatu ba PR

Iha fatin  hanesan no oras ne’ebé la hanesan   eis Prezidenti  Repúblika, José Ramos Horta, hatete, polítiku nain sira husi CNRT labele fo ultimatu ba Xefi Estadu, tamba bele aumenta tan konflitu, diak liu mak lider polítiku sira tur  hamutuk  koalia didiak ba malu hodi solusiona impase polítiku ne’e.

Horta afirma lia hirak ne’e bainhira husu kona-ba kuadru munisipal Partidu CNRT  inklui Rejiaun Administrativa Espesial Oe-cusse Ambeno ne’ebé fo ultimatu ba Prezidenti Repúblika atu solusiona lalais problema formasaun  Governu ne’ebé to’o agora seidauk kompletu.

“Dala ruma ita halo  ultimatu, no depois aumenta tan  konflitu  iha tensaun nia laran, maibe fo ultimatu karik ita laiha kapasidade atu rezolve problema polítiku ida, no depois la konsege implementa ultimatu ne’e, tamba laiha maioria atu halo prosesu ruma,”dehan Ramos Horta ba Jornalista sira hafoin remata  enkontru ho Prezidenti Republika Francisco Guterres ‘Lu-Olo’ iha Palasiu Prezidensial  Nicolau Lobato Bairo Pite,  Dili, Kinta (09/08/2018).

Horta lia tun tan katak, diak liu mak koalia didiak ba malu, tamba nia rona Prezidenti Repúblika prontu atu koalia ho ema hotu, tamba ne’e mak diak liu lalika ultimatu ba malu.

Premiadu nobel ba paz José Ramos Horta ne’ebé fo tiha ona apoiu ba partidu FRETILIN ne’e hatutan tan katak, lakohi fo opinaun ba lista kandidatu membru Governu nain 9 ne’ebé seidauk simu pose, tamba ne’e poder iha Prezidenti Repúblika  ho Governu.

“Ha’u  fiar bele hetan solusaun, tamba primeiru respeita letra espiritu ita-nia konstituisaun, Prezidenti nia konviksaun  rasik nu’udar Prezidenti, no respeita mos Governu nia responsabilidade atu  kompleta Governu ne’e, maibe Governu mos tenki haree elementu ne’ebé tuir kompetensia ezemplu Jornalista ne’ebé hakarak ba servisu iha mídia ha’u la fiar kompañia mídia sira atu simu kedan, maibe presiza liu husu selesaun mak foin jornalista ida bele servisu iha mídia refere,”hatutan Ramos Horta.

Horta afirma, nia lakohi komenta kualidade membru Governu nian, maibe Prezidenti no Primeiru Ministru  mos iha preokupasaun  kona-ba kestaun ida ne’e.

“La’os deit xefi partidu sira mak ida idak kuandu hili ema ba Governu tenki hare didiak, tamba Governu servi povu ho matenek no esperensia. Portanto diálogu mak sira tenki halo, no ha’u fiar iha tempu badak bele iha solusaun, tamba ha’u haree Priemiru  Ministru nia esforsu duni,  simpatia barak ba Primeiru Ministru, ami seidauk koalia to’o, mas ha’u haree estres ne’e normal, no nafatin esforsa-an para rezolve situasaun ida ne’e,”dehan Ramos Horta.Oly


Banner

Foto

Notisia Ikus

PM Taur husu sidadun hotu tenke kria paz durante kampaña eleitorál

January 17, 2022
Primeiru Ministru (PM) Taur Matan Ruak apela ba ...

Lú Olo Rekandidata–an ba Prezidente Repúblika

January 17, 2022
[caption id="attachment_58994" align="aligncenter"...

Eleisaun ba PR Sei Realiza iha Loron 19 Marsu

January 17, 2022
[caption id="attachment_58989" align="aligncenter"...

Ema na’in 10 hatudu prontidaun kandidata-an ba PR

January 16, 2022
[caption id="attachment_58967" align="aligncenter"...

Lere sei deklara ninia kandidatura ba PR iha Ainaro

January 15, 2022
Xefe Estadu Maiór Jenerál F-FDTL, Tenente Jene...
1 2 3 681

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker