Porta Voz Grupu Rezisténsia Nasionál Defende Justisa no Konstituisaun (RNDJK), Ângela Freitas, hatete, Prezidente Repúblika (PR), Francisco Guterrres Lú Olo, ho Primeiru Ministru (PM), Taur Matan Ruak, la merese ukun ona nasaun Timor-Leste, tanba sira la produtivu ona no viola tiha ona Konstituisaun Repúblika Demokrátika Timor-Leste (KRDTL).
“Sé ita mak uza nafatin ita-nia lider sira ne’ebé la produtivu ona mak ita sei hasoru problema boot, tanba ne’e tempu to’o ona ita-nia inan no maun sira ne’ebé tama ona idade reforma ka la produtivu ona, reforma ona para fó oportunidade ba jerasaun foun sira atu jere ita-nia nasaun ne’e, tanba ne’e inkapasidade governasaun, PR viola konstituisaun, inkapasidade PR hodi solusiona situasaun rai-laran”, Porta Voz grupu RNDJK iha konferénsia ba imprensa, Kuarta (26/08), iha sede RNDJK, Bairu Formoza, Díli.
Tuir Ângela, sira (PR no PM) viola tiha ona KRDTL, tanba ne’e mak husu sira-nia konsiensia atu labele halo abuzo de poder tuir ida-idak nia hakarak no gostu, tanba nasaun RDTL ne’e iha ninia regra.
Tanba Porta Voz grupu RNDJK, husu ba PR ho konsiensia obrigatóriu atu rezigna-an hodi ema rezisténsia balun troka ba kaer ukun.
Tuir dadus provizóriu ne’ebé grupu RNDJK rekolla hatudu katak, ema ne’ebé atu partisipa asaun pasífika hodi kontra PR Lú Olo ho PM Taur Matan Ruak ne’ebé ukun la tuir konstituisaun iha loron (4/08/2020), ne’e hamutuk ema rihun 200 resin.
Fatin fiksu ne’ebé grupu RNDJK sei hala’o asaun pasífika hodi hato’o sira-nia karta petisaun ba PR, Francisco Guterres Lú Olo atu rezigna-an mak fatin 744 kampu Becora no mós Tasi Tolu.
Entretantu antes atu hala’o konferénsia ba imprensa ne’e, Kapelaun Hospital Nacional Guido Valadares (HNGV), Francisco Fatima dos Santos Barreto, husu ba Na’i Maromak haraik bensaun hodi tulun RNDJK hala’o asaun pasífika la’o di’ak no ho susesu. tos
