Governu liu husi Konsellu Ministru (KM), deside propoin ba Prezidente Repúblika (PR), Francisco Guterres Lú Olo, hodi estende tan Estadu Emerjénsia (EE) dalima ba loron 30.
Ministru Prezidensia Konsellu Ministru (MPKM), Fidelis Leite Magalhães, hateten, haree ba evolusaun husi situasaun epidemiolójika no proliferasaun kazu kontájiu COVID-19 ne’ebé rejista ona no hamosu preokupasaun maka’as iha nível rejionál no mós mundiál, ho nune’e Governu deside hodi estende tan EE.
“Ha’u hanoin ita hotu agora ne’e hatene ona lala’ok EE oinsa, ne’e la’os buat foun, maibé Governu bele halo atuasaun di’ak liu iha ita nia esforsu kontra COVID-19, estensaun EE nia natureza hanesan de’it, agora implementa hela laiha diferensia, maibé ba seguransa jurídika iha implementasaun hirak ne’e, KM deside husu PR atu deklara EE”, dehan, MPKM ne’e iha Palásiu Governu, Kuarta (26/08/2020).
Governante ne’e esplika, Governu konsidera virus ne’e to’o oras ne’e seidauk iha tratamentu, ai-moruk, vasina no númeru vítima ou infetadu iha nasaun sira iha rejiaun aumenta, liu-liu iha nasaun viziñu sira aumenta maka’as, nune’e dalan di’ak liu mak EE. Cin
