GMN TV Politika Partisipasaun feto TL iha vida polítika di’ak liu nasaun seluk iha CPLP

Partisipasaun feto TL iha vida polítika di’ak liu nasaun seluk iha CPLP

0 views

Vise Prezidente Parlamentu Nasionál (PN), Maria Angelina Sarmento relata, feto Timor-Leste (TL) nia partisipasaun iha vida polítika di’ak liu kompara ho nasaun seluk ne’ebé hetan independensia kleur ona hanesan nasaun sira iha Comunidade dos Países de Língua Portuguesa (CPLP).

Tanba TL iha kinta lejislatura, konsege hetan reprezentasaun feto parlamentár kuaze porsentu 40.

 “Hafoin TL independensia no ratifika tiha konvensaun internasionál ba CEDAW ka konvensaun ba halakon forma diskriminasaun oi-oin kontra feto no labarik. Ita haree katak TL feto ho labarik iha progresu lubuk ida ne’ebé mak iha kompara ho país sira seluk ne’ebé hetan independensia kleur liu TL. TL iha progresu barak teb-tebes, ne’ebé TL sai mós referénsia ba nasaun sira seluk kona-bá polítika dezenvolvimentu igualdade jéneru. Ida primeiru liu mak ita nia progresu iha setór polítika, tanba ita TL alkansa partisipasaun feto iha polítika, liu-liu feto iha PN atinji 40% no númeru persentajen ida ne’ebé mak boot iha nível CPLP, nune’e mós iha nível Ázia ne’ebé halo TL maske nasaun ida ne’ebé nurak, maibé ninia promosaun ba igualdade jéneru iha hakat ida ne’ebé dook. Maibé la’ós de’it iha PN iha parte Governu ni’an mak ita haree sei iha dezafiu, entermus membru Governu sira ne’ebé hetan nomeasaun polítika ho ninia persentajen sei kiik, 13% de’it, husi membru Governu da-ualu ni’an”, Vise Prezidente ne’e ba liu husi ninia diskursu bainhira partisipa iha sensibilizasaun konvensaun CEDAW, iha Tower-Fatuhada, Díli, Tersa (18/08/2020).

Deputada PLP ne’e afirma tan, maske iha vida polítika hetan partisipasaun ne’ebé di’ak ona husi feto TL, maibé iha setór balun sei iha difikuldade.

“Iha fali setór edukasaun ita iha progresu mós, ita kria ona polítika sobre eskolaridade 12 anus eskolaridade obrigatóriu ne’e aplika ba feto mane no ba sidadaun hotu ne’ebé mak nia oan iha idade estudu ni’an. Iha setór ekonomia ita haree absorve kampu de traballu persentajen feto sei ki’ik, ita kompara iha TL kampu traballu feto ho idade 15 ba leten, ita foin alkansa 25%, enkuantu ba mane sia kuaze absorve 50%, ne’e persentajen ida ne’ebé boot husi mane kompara ho feto sira. Iha setór justisa mós sei iha difikuldade ba feto sira atu hetan justisa ida ne’ebé sira hakarak, liu-liu ba kazu ne’ebé liga ho violensia seksuál, inklui krime sira ne’ebé liga ho violensia bazeia ba jéneru, ne’ebé dalabarak feto nia koñesimentu mínimu, laiha asesu atu bele hetan dalan ba justisa ne’ebé sira hakarak, ho nune’e sira barak dezanima hodi la lori ba oin. Ho ida ne’ebé mak loke dalan ba violensia doméstika kontinua prevalese ba iha ita-nia rai”, tenik Maria Angelina.

Alende ne’e, Prezidente Rede Feto, Judit Diaz Ximenes, hateten, Feto TL sei menus iha administrasaun teritoriál no nível autoridade lokál sira hotu, tanba ne’e presiza hetan promosaun di’ak liu tan.

“Iha vida polítika ita haree maske iha reprezentasaun iha PN iha pursentu boot ona, maibé administrasaun teritoriál ita feto laiha, iha munisípiu mós laiha feto ruma mak okupa hanesan administradora ka prezidente autoridade iha postu sira mós laiha, iha suku mós kontinua dezigualdade, tanba reprezentasaun feto seidauk iha, mortalidade inan no oan sei kontinua aas. Iha parte edukasaun mós ema barak sei kontinua abandona eskola no hapara husi eskola mós sei barak, liu-liu inan-feton sira ne’ebé hasoru problema depois de tama iha prosesu aprendizajen. Maibé Rede Feto ho parte barak sei esforsu nafatin ba dezafiu ne’ebé mak iha. Rekomendasaun sira ami halo fila-fila ona, ezemplu iha parte lei ni’an, uluk lei ba eleisaun Xefe Suku halo mudansa iha ne’eba katak, bainhira kuandu seidauk iha feto ida mak kandidata-an ba líder komunitáriu iha suku ida, entaun labele prosede lai ba eleisaun, eseptu suku ne’e mak deklara katak laiha feto atu kandidata-an”, subliña Judit ba jornalista.

Entretantu, iha kinta lejislatura, reprezentante feto iha PN porsentu 40 kompara ho lejislatura sira anteriór, inklui iha Governu da-ualu iha feto ho porsentu 13 mak envolve iha governasaun refere.

Maske nune’e, iha setór ekonomia feto absorve kampu traballu sei ki’ik liu kompara ho mane, tanba feto ho de’it porsentu 25 no mane porsentu 50. Say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker