Parlamentu Nasional (PN), aprova Lei Kódigu Mineiru (LKM), iha faze jeneralidade ho unanimidade.
Ministru Petroleu no Mineral, Vitor Da Conceicão Soares, hateten, Lei Kódigu Mineiru (LKM) importante ba dezenvolvimentu sosial, inklui mós ba explorasaun riku-soin no lei ne’e sei fó dalan ba emprezariu sira bele halo investimentu iha área refere.
Lei ne’e sei fó kampu traballu ba Timor-Oan sira, tanba bainhira lejislasaun ne’e iha ona, bele garantia ba kompañia atu halo investimentu, hodi hasa’e roda ekonomia Timor-Leste ni’an.
Lei mineiru ne’e, la’os foin hamosu iha tinan ne’e, maibé lei ne’e mosu kedas iha tinan 2008, maibé lejislasaun ne’e la hetan aprovasaun iha Parlamentu Nasional.
“Ita hotu hanoin katak lei ne’e importante tebes ba ita nia dezenvolvimentu ekonómiku sosial no mós ba oinsa atu bele estrai ita nia riku-soin sira ne’e, hodi bele fó benefisiu ba ita nia sosiedade, liu-liu fó kampu traballu no mós kompromete ba ita nia ekonomia, ba ita nia kresimentu ekonómiku, ita hatene katak durante ne’e ita depende fonte úniku mak petroleu, ita iha fundu petróliferu”, dehan, Ministru Petroleu no Mineral, Vitor da Conceicão Soares, iha PN Kinta (30/07).
Governante ne’e afirma, lei kódigu mineiru ne’e abranjente no sei fó biban no posibilidade ba investidor sira atu halo investimentu iha área refere.
Projetu lei ne’e iha nia baze, sei iha mós nível implementasaun no sei iha mós lei adisional ne’ebé Governu sei deside ho diploma ministérial, atu nune’e evita prátika hirak ne’ebé liu ona, liu-liu la fó satisfasaun ba sosiedade.
Lejislasaun ne’e, sei fó mós garantia ba dezenvolvimentu iha tempu oin mai, kuandu halo explorasaun ba riku-soin Timor ni’an hanesan mármore, fatuk, osan mean, rai-henek, mina, materia prezioza, inklui riku-soin seluk. Ina
