Prezidente Komisaun F ne’ebé trata asuntu saúde iha Parlamentu Nasionál (PN), Noe da Silva “Buka Tuir”, hateten, komisaun F PN seidauk iha informasaun kona-bá stock ai-moruk porsentu 28 laiha iha Servico Autonomo de Medicamentos e Equipamentos de Saude (SAMES).
“Ami seidauk simu informasaun, ha’u foin simu, ami seidauk hetan klarifikasaun direta husi Ministra Saúde tutela ba asuntu saúde, tanba ne’e, ami seidauk bele fó informasaun ne’ebé di’ak klaru”, Prezidente Komisaun F PN ne’e ba GMN iha PN, Sesta (21-08-2020).
Noe akresenta, Komisaun F PN sei halo klarifikasaun ba iha terenu, nune’e bele hetan informasaun ne’ebé klaru katak, realidade stock ai-moruk laiha duni ka lae.
“Ai-moruk sira ne’e depende ba nia item ai-moruk ne’e kauza moras ligasaun ba ai-moruk stock laiha ne’e, ita seidauk identifika loloos sei bele fó informasaun detalla. Ho nune’e komisaun F PN sei halo fiskalizasaun direta ba iha terenu hodi hatene informasaun loloos kona-bá stock ai-moruk”, tenik Prezidente Komisaun F PN ne’e.
Hafoin entrevista, Prezidente Komisaun F PN telefone direta ba Ministériu Saúde (MS), maibé stock ai-moruk falta de’it porsentu 24.
Antes ne’e, Diretór SAMES, Santana Martins, hateten, Stock ai-moruk porsentu 28 mamuk iha armajen SAMES no prosesu sosa medikamentu ba tinan 2020 ni’an utiliza orsamentu Dotasaun Orsamentu Temporáriu (DOT) tinan 2019 ho montante millaun 3.7. ety
