Bankada opozisaun no bankada Governu iha uma fukun Parlamentu Nasionál (PN) preokupa ho kapasidade ezekusaun orsamentu fundu Corona Virus Disease 2019 (COVID-19), tanba ne’e, Governu presiza hadia jestaun.
Vise Xefe bankada CNRT, Patrocínio Fernandes, hateten, durante ne’e CNRT mós kestiona maka’as kapasidade Governu ba ezekusaun fundu COVID-19 no Orsamentu Jerál Estadu (OJE).
“Ha’u hanoin ezekusaun ba orsamentu ne’e ami hateten dalabarak ona Governu laiha kapasidade ezekusaun la’ós ba fundu COVID de’it, maibé ba orsamentu hotu-hotu“, Vise Xefe bankada CNRT ne’e ba jornalista sira iha PN, Segunda (10-08-2020).
Husi sorin seluk, deputada bankada FRETILIN, Josefa Álvares Pereira Soares hateten, kapasidade ezekusaun fundu COVID, la’ós bankada opozisaun de’it mak preokupa, maibé bankada Governu mós preokupa, tanba Governu falla iha jestaun.
Tuir bankada Governu nia haree iha buat balun ezekuta ona, maibé iha fallansu balun tenke hadia, atu haree ba kazu COVID-19 labele iha tan no atake ba povu ho pursentu ne’ebé boot.
“Rejistu kazu COVID-19 na’in ida (1) laiha politizasaun ba polítiku, ita hakarak kona mate tiha mak foin fiar, ita tenke prevene antes, sé nia ba ona sala izolamentu signifika iha ona vítima, ita labele sai são Tome demais, haree mak fiar, ne’e labele“, tenik Josefa.
PN aprova primeira transferénsia estraordinária ba fundu COVID-19 hamutuk USD tokon 150 no segunda transferénsia estraordinária ho montante USD tokon 70, maibé Governu foin ezekuta de’it porsentu 48. ety
