GMN TV Politika PR Lú Olo: Fó valór ba luta FALINTIL, Joven presiza estuda maka’as dezenvolve TL

PR Lú Olo: Fó valór ba luta FALINTIL, Joven presiza estuda maka’as dezenvolve TL

0 views

Prezidente Repúblika (PR), Francisco Guterres Lú Olo, hatete, joven sira labele baruk hodi aprende no banati tuir valór sira asua’in FALINTIL sira hatudu iha tinan 24 nia laran, hodi kontinua hatutan sakrifísiu sira nian ho estuda maka’as, badinas no ajuda malu hodi dezenvolve Timor-Leste (TL) ba oin.

“Ho ksolok tebes ohin ha’u mai hamutuk ho maluk sira iha fatin ida ne’e atu selebra loron aniversáriu FALINTIL ba-dala haat nulu resin lima. Loron ida ohin mós fó-hanoin hikas mai ita sira ne’ebé sei moris atu kontinua hatutan mehi no valór sira ne’ebé asua’in FALINTIL sira husik hela mai ita”, dehan Lú Olo iha ninia diskursu ba selebrasaun aniversáriu FALINTIL ba dala 45, Kinta (20/08/2020), iha Kuartel Jeneral F-FDTL, Fatuhada, Díli.

Nia hatutan, tema selebrasaun loron FALINTIL ba tinan ne’e mak “Ho Espíritu FALINTIL nian, ha’u prontu no desididu atu serve interese Povu no Nasaun ni’an”. Tema ne’e partikularmente bolu ema ida-idak atu reafirma pozisaun ho reflexu ba istória lala’ok FALINTIL ni’an durante luta ba libertasaun pátria.

“Valór sira ne’ebé asua’in FALINTIL husik mai ita mak serve onestu atu kore povu ida ne’e husi mukit nia laran. FALINTIL, tuir nia naran rasik hatete, harii hodi liberta ita-nia rai husi okupasaun estranjeira, ho objetivu polítiku atu manán funu hasoru invazór. Klaru, la fásil atu atinji mehi ida ne’e, maibé liu husi servisu hamutuk ho ita-nia povu, sai duni realidade. Tanba ne’e mak ita dehan bei-beik katak FALINTIL mak ikan no povu mak hanesan bee”, akresenta Lú Olo.

Xefe Estadu ne’e realsa, tempu to’o ona atu prezerva istória loloos ba jerasaun sira tuir mai, istória loloos mak sei sai abut no valór ne’ebé metin ba jerasaun sira tuir mai. Ho nune’e, husu nafatin ba Governu atu kolabora no halibur dadus husi kombatentes, organizasaun rezisténsia no ema hotu atu fó apoiu ba ekipa ka organizasaun sira hanesan Komité Orientador 25, Komisaun Peskiza no Elaborasaun Istória Luta Feto Timor,  Sentru Audiovisual Max Stahl, Sentru Nasionál-CHEGA, Arkivu no Muzeu Rezisténsia no organizasaun seluk tan, ne’ebé hahú rejista no hakerek dau-daun istória kona-bá papél organizasaun rezisténsia ka organizasaun juventude ka feto ni’an iha prosesu luta libertasaun nasionál.

“Ba veteranu no kombatente sira ne’ebé sei moris, ha’u apela atu kontinua tatoli imi-nia istória rasik ba imi-nia oan no família sira no ba povu tomak hodi hatutan ba jerasaun tuir mai, istória ne’ebé tuir faktus mak sei fó valór loloos ba sakrifísiu tomak hosi asua’in sira ba pátria ida ne’ebé sei hamoris patriotizmu no nasionalizmu no ba jerasaun sira tuir mai atu kaer metin valóres solidariedade, espíritu sakrifísiu, kriativu no fó-an tomak ba povu no nasaun. Ho nune’e, ha’u fiar katak ho istória loloos de’it mak ita-nia jerasaun tuir mai sei iha orgullu atu konta no hakerek nafatin kona-bá Gloriozas FALINTIL nia istória ho letra osan mean”, subliña Prezidente Repúblika. Oly


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker