Prezidente Repúblika (PR), Francisco Guterres Lú Olo, promulga ona lei Medidas Prevensaun no Kombate Korrupsaun (MPKK).
Tuir komunikadu imprensa husi Palásiu Prezidensiál Segunda (24/8/2020), haktuir, promulgasaun Lei Medidas Prevensaun no Kombate Korrupsaun sei hametin liu tán fiar públiku nini’an ba instituisaun sira ne’ebé Estadu harii. Atu nune’e ba oin implementasaun lei ne’e sei hametin fila-fali fiar sidadaun ni’an ba integridade, transparénsia, efisiénsia, efikásia instituisaun Estadu, hodi serve ba interese públiku.
Iha karta ba Parlamentu Nasionál (PN), PR hateten: “Prevensaun no kombate kontra korrupsaun la’ós de’it liu husi aprovasaun lejislasaun no montajen sistema ba institusoins ne’ebé nu’udár núkleu sentrál. Importante tebes prevensaun no kombate korupsaun atu insituisaun funsiona efetivamente tuir prinsípiu legalidade, izensaun, transparénsia, efisiénsia, efikásia, simplisidade no previsibilidade ba prosedimentu no mós iha partisipasaun husi atores prinsipais, inkui instituisoins profisionais no sidadaun, iha área no prosedimentu ho finalidade atu servi interese públiku”.
PR apela ba Governu no Parlamentu Nasionál atu apoia Komisaun Anti-Korupsaun, Prokuradória Jerál Repúblika, Polísia Sientífika no Investigasaun Kriminál no Tribunal Rekursu hetan meius nesesáriu atu kombate korupsaun ho efetivu, liu husi atribuisaun Orsamentu Jerál Estadu (OJE), hodi permite iha rekursu umanu espesializada, tékniku no finanseiru sira, atu susesu iha misaun komplexu ida ne’e iha luta kontra korupsaun no krime organizadu.
PR iha ninia karta ba Parlamentu Nasionál hateten, implementasaun lei ba Prevensaun no Kombate Korupsaun, atu iha impaktu efetivu no alargadu, lei ne’e rasik presiza fali regulamentasaun komplementár, liu husi Dekretu-Lei no Dekretu sira seluk, liu-liu relasiona ho área vulneravel sira iha verifikasaun korupsaun no konflitu interese nini’an.
Parlamentu Nasionál, iha 20 fulan Jullu, tinan 2020, aprova Lei Medidas Prevensaun no Kombate Korrupsaun ho unanimidade ho votus 61.*/GMN
