Sekretáriu Estadu Arte Kultura (SEAK) séi harii biblioteka nasionál, hodi konsérva livru sira ne’ebé hakerek husi eskritór no akadémiku sira.
“Prosesu progresu tenderizasaun atu harii biblioteka to’o ona 75 porséntu no iha fulan Sétembru sei anunsia ba públiku kompañia ne’ebé sai manan na’in”, dehan SÉAK, Teófilo Caldas ba jornalista sira, Tersa (25/08/2020), hafoin sai oradór iha séminariu ne’ebé realiza husi UNTL.
SEAK haktuir, orsamentu ba harii biblioteka la’os husi Governu, maibé orsamentu mai husi kompañia INY ne’ebé fó gratuita ba SEAK hahú husi tinan 2019 to’o agora.
“Ida ne’e, ha’u hanoin laiha problema, tanba orsamentu mai husi kompañia no fatin mós iha ona no iha tinan 2021 ita bele implementa, tanba biblioteka nia funsaun atu konserva ba livru sira ne’ebé eskritór no akademista sira hakerek”.
Nia dehan, biblioteka refere séi fasilita ema hotu atu asesu no biblioteka ne’e harii ho osan USD millaun 10, iha area Hudi-Laran, Ministériu Planeamentu no Investimentu Estratéjiku (MPIE) nia kotuk, ne’ebé séi okupa rai hektare 2 resin, ho moru ho drenajen kompletu, hein de’it rezultadu tenderizasaun sai, kompañia bele ba halo lansamentu primeira pedra hodi hahú konstrusaun.
Entretantu, oras ne’e dau-daun SEAK rekolla ona livru kuaze rihun hitu nulu (70), husi eskritór no akademista sira iha rai-laran. fel
