Prezidente Repúblika (PR), Francisco Guterres Lú Olo, veta alterasaun dahuluk lei resenseamentu eleitorál, hafoin Tribunál Rekursu (TR) deklara, inkonsitusionalidade.
Tuir komunikadu ne’ebé GMN asesa husi gabinete média Prezidente Repúblika sita, análiza TR nian ba dekretu Parlamentu Nasionál (PN) ne’e, iha artigu 17, númeru 2 mak inkonstitusionál.
No fundamentu tribunál nian ba artigu 17 ne’e, “konfronta” ho konstituisaun RDTL artigu 38 kona-ba protesaun dadus pesoál.
Ne’e viola prinsípiu ba espesifikasaun ba finalidade no limitasaun ba uzu ne’ebé hateten iha artigu 38 husi konstituisaun, “introdúz restrisoins ne’ebé bele vulnera ho dalan injustifikadu, no ho forma la proporsionál” sita iha komunikadu ne’e.
Tanba ne’e, deketu parlamentu ne’e limite tiha direitu klarifikasaun kona-ba finalidade dadus sira, nomós la garante direitu seguransa no integridade ema ida-idak nian.
Konteúdu husi artigu 17 ne’e hatete, Diretór Jerál STAE autoriza komunikasaun dadus permanente, husi baze dadus resenseamentu eletorál ho instituisaun “bankária sira finanseira” no telekomunikasaun ne’ebé hetan lisensa iha territóriu nasionál, ba efeitu verifikasaun identidade rezidénsia.
Dekretu PN númeru 43/V primeira alterasaun lei resenseamentu eleitorál, iha sesaun plenária, iha loron 28 fulan Juñu ne’e, PN aprova ho votu unanimidade 62.GMN
