Deputada bankada CNRT, Maria Barreto Gorumali, husu Primeiru Ministru (PM), Taur Matan Ruak ho Ministra Saúde (MS) Odete Freitas Belo atu rezigna-an, tanba fó vasina AstraZeneca doze balun át ka inválidu ba populasaun ne’e krime.
Bankada opozisaun ne’e konsidera, ida ne’e nu’udar erru ne’ebé grave liu komete hosi atúal Ministra Saúde, kompara ho erru ne’ebé eis Vise Ministra Saúde, Elia dos Reis Amaral, komete.
“Situasaun ida ne’e, ita haree katak, Governu inkapasidade ba iha vasina AstraZeneca, ne’e viola ema nia direitu, tanba ne’e ita ko’alia kona-bá ema, la’ós animal mak mai simu vasina. Ha’u sujere, di’ak liu Primeiru Ministru no Ministra Saúde rezigna-an” nia husu, iha plenária Kinta (13/08).
Bankada apoiu Governu rekoñese aktu ida ne’e fallansu ida, maibé nia parte hanesan Prezidente Komisaun F ne’ebé trata asuntu saúde seidauk iha dadus kompletu.
“Ha’u mós foin simu informasaun ida ne’e, katak armajenamentu iha ne’ebá ne’e dehan aimoruk (vasina) balun a’at, maibé prátikamente ami seidauk ba halo fiskalizasaun iha terrenu,” dehan Deputadu PLP, Noe da Silva ‘Buka Tuir’.
Alénde ne’e, Primeiru Ministru, Taur Matan Ruak, liu hosi publikasaun ne’ebé GMN asesa iha pájina ofisiál Gabinete Primeiru Ministru nian, Xefe Governu husu ona deskulpa ba profisionál saúde ho utente ne’ebé simu ona vasina AstraZeneca ne’ebé nia doze balun inválidu.
Insidente ne’e akontese iha loron 10 to’o 15 fulan Juñu liuba, iha Hospitál Nasionál Guido Valadares (HNGV).Say
