Primeiru Ministru (PM), Taur Matan Ruak, hatete, posibilidade Governu sei termina Estadu Emerjénsia (EE) iha fulan Outubru, tinan ne’e, bainhira populasaun simu ona vasina COVID-19 kompletu %70 resin.
Entretantu sidadaun ne’ebé mak seidauk kompleta vasina dahuluk no daruak, sei responsabiliza rasik, tanba esforsu hotu kombate coronavirus Governu halo ona.
“Ha’u fiar iha finais Setembru hanesan ne’e, ita bele ba normalidade fila-fali, provavelmente ita sei iha Outobru, ita la avansa fali ona ba Estadu Emerjénsia, ita ba normalidade” informa Xefe Governu ne’e, iha seremónia entrega vasina AstraZeneca doze 300.000 husi Governu Austrália, iha SAMES, Kampung Alor-Díli (11/08).
Tanba tuir Xefe Governu ne’e, vasina mak dalan úniku ba kombate COVID-19, tanba virus ne’e sei la lakon husi mundu.
“Provavelmente ita sei konsidera hanesan moras bai-bain no ita sei moris hamutuk nia iha tempu naruk nia laran” Matan Ruak argumenta.
Atualizasaun dadus husi Ministériu Saúde, Kinta 12, fulan Agusto ne’e hatudu, sidadaun kompleta ona vasina dahuluk atinje 43,9% no doze daruak atinje ona 15,3%.Ags
