Xefe Casa Civíl, Francisco Maria de Vasconcelos, relata, rezultadu teste rastreiu ne’ebé ekipa saúde halo iha Sesta (20/08) ne’e, ba funsionáriu besik atus ida, husi Palásiu Prezidensiál hatudu, funsionáriu 38 no labarik 1 (funsionáriu nia oan) konfirmadu pozitivu COVID-19.
“Husi Sesta feira ami halo swab ba ema sentu i tál husi Casa Civíl ho Casa Militár, iha 38 mak hetan pozitivu,” informa Xefe Casa Civíl, iha palásiu prezidensiál, Bairo-Pité Segunda (23/08).
Dadaun ne’e servisu saúde transfere ona pasiente sira ba sentru izolamentu otél Novo Horizonte, Metiaut.
Funsionáriu sira ne’e, kompleta ona vasina doze dahuluk no daruak, nu’udar medida atu kombate coronavirus, no tuir estratéjia Governu nian, atu hakat ba nova normalidade.
Francisco de Vasconcelos esplika, dahuluk Xefe Casa Civíl ho ekipa vizita komunidade iha Same, no ekipa saúde iha Same rasik halo teste rastreiu deteta funsionáriu na’in tolu mak pozitivu uluk, hafoin kontinua teste funsionáriu sira seluk iha Díli.Dms
