Primeiru Ministru Taur Matan Ruak deklara, Governu sei transforma foho Matebian ne’ebé lokaliza iha Munisípiu Baucau, sai fatin turízmu istóriku, nune’e bele kontribui reseita ba Estadu.
Taur Matan Ruak hatete, Matebian nu’udar fatin istóriku, tanba iha tinan 1978 no 1977, FALINTIL no povu barak mak subar iha areadór foho ne’e nia, hodi halo funu hasoru tropa Indonézia sira.
No konsidera, foho ne’e hanesan baze ikus liu ba FALINTIL, bainhira baze de apoiu husi fronteira oeste, norte, súl, hetan okupasaun maka’as husi tropa Indonézia.
“Matebian mak ikus liu rahun iha Timor, fatin ida ne’e uluk ita asegura populasaun hamutuk rihun atus ida haat nulu mak iha leten, iha momentu ne’ebá ha’u mak komandante kompañia, hau sei 20 anos komanda ema besik rihun ida, para fó seguransa ba foho ida ne’e, entaun matebian iha signifika boot loos. Entaun hau hanoin ita-nia foho ida ne’e bele sai turízmu istóriku, turízmu kulturál iha país aziátiku” dehan Xefe Governu ne’e, iha ámbitu retiru nasionál entre sosiedade sivíl ho VIII Governu, ne’ebé realiza iha Uaibitai, Postu Administrativu Quilicai, Munisipiu Baukau, Sábadu (21/08).
Ministru Turizmu Komérsiu no Indúsria mós afirma, planu husi Governu atuál nia balu mak dezenvolve turízmu komunitáriu, ne’ebé dadaun ne’e implementa ona iha Munisípiu hotu.
“Dezenvolve turizmu iha rai-laran ne’e mak ita hamosu turizmu komunitária ka turizmu ne’ebé mak baze husi komunidade, tanba ne’e iha ona programa balun la’o ona iha teritóriu laran, espesifikamente ka partikularmente ba Quilicai tama iha pakote turizmu ida naran dalan ba rejisténsia” dehan José Lucas.Avi
