Parlamentu Nasionál (PN) kestiona, besik ona fulan haat, Governu seidauk rekupera infraestrutura sira ne’ebé, hetan estragu husi Dezastre Datural (DN) iha loron 4, fulan abríl liu bá.
Prezidente komisaun E ne’ebé trata asuntu infraestrutura, Deputadu Abel Pires kestiona, se Governu la hadia etragus sira ne’e, sei fó risku liu-tan ba populasaun, bainhira akontese fali udan iha tempu tuir mai.
“Ha’u hanoin orsamentu ba tinan oin, favór ida tau konsentrasaun ba halo manutensaun la’ós de’it ba Estrada, maibé ho mós ponte” kestiona Deputadu Abel Pires, iha plenária komisaun permanente, iha PN Tersa (03/08).
Dadus ne’ebé aprezenta husi deputadu ne’e hatudu, estrada Manleu ba Sarlala ne’e lubuk ida mak aat, Aileu ba Ainaro ponte balun mos aat, estrada Manatuto liga Natarbora, Tibar ba Gleno, Maubara ba Loes identifika infraestutura balun presiza duni halo manutensaun.
Hosi parte Leste hanesan Baucau ba Lautém iha ponte 8 mak presiza halo manutensaun, tanba difísil viatura no ema atu ultrapasa.
Bankada CNRT mós sujere Governu atu halo ona manutensaun ba ponte Loes, ne’ebé ameasa atu kotu.
“Se udan tau rai agora ponte monu ba ona, hosi Bobonaro atu mai Díli labele, ne’e duni ida ne’e tenke tau atensaun,” dehan Deputadu CNRT, Marcos Xavier.
PN mos aprova ona OJE 2021 ho montante USD billaun 1.895, atu finánsia despeza Governu durante tinan 2021, kompostu husi saláriu no vensimentu millaun USD 239,2, bens no servisu millaun USD 421,49, transferénsia públika millaun USD 669, 91, kapitál menór millaun USD 61,14 no fundu kapitál dezemvolvimentu hamutuk millaun USD 503,20.
Maibé hafoin TL hasoru dezastre natural Siklone Seroza iha fulan Abríl liu-ba, PN altera fali lei OJE 2021 nian, hodi aprova fali Orsamentu Retifikativu (OR) ho montante millaun USD 223,8 ne’ebé aloka ba fundu kontijénsia, fundu infraestrutura no fundu COVID hodi responde urjénte ba kalamidade ne’ebé akontese no pandemia COVID-19.Say
