Parlamentu Nasionál (PN), liu hosi Deputadu Bankada CNRT, Duarte Nunes hetete, sentru izolamentu Vera Cruz no Lahane menus fasilidade saúde hodi atende pasiente COVID-19, ne’e la’os kulpa Governu anterior nia, ne’ebé lidera husi partidu CNRT.
“Uluk COVID mai iha sa tinan, Governu anterior ne’e iha sa tinan mak Governu la tau fasilidade COVID ne’e, agora ita dun ba ema. Buat ida uluk ami aprende iha ai-laran mak ne’e, nia krítika dehan hau sala, hau sala, hau hadia” dehan Xefe Bankada CNRT, ba Jornalista sira, Kuarta (25/08).
Problema fasilidade iha sala izolamentu Vera Cruz no Lahane mak hanesan oxijéniu, fasilidade saúde ba proteje pesoál saúde hodi atende pasiente COVID-19 la sufisiente.
Mesmu kontinua sentru izolamentu sira ne’e hasoru difikuldade, maibé relatóriu Ministériu Finansa nia ne’ebé publika iha loron 17, fulan ne’e katak, taxa ezekusaun fundu COVID-19 atinje ona millaun USD 100 resin ka 35%, husi orsamentu retifikativu alokadu millaun USD 287.6.
Taxa ezekusaun tuir klasifikasaun ekonómiku aas liu, iha kategoria transferénsia públika, ne’ebé ezekuta ona, millaun USD 31.2, husi orsamentu alokadu millaun USD 81.2.
Ezekusaun ba bens no servisu, ezekuta ona millaun USD 67.4, husi orsamentu alokadu millaun USD 194.5.
Enkuantu kapitál menór, ezekuta ona rihun USD 675.000, husi orsamentu alokadu, millaun USD 3.7. Kapitál dezenvolvimentu, ezekuta ona, rihun USD 782.600, husi orsamentu alokadu millaun USD 8.1.Eca
