Ministra Negósiu Estranejeiru no Kooperasaun (MNEC-Sigla Portugés) ,Adaljiza Magno, rejeita, informasaun kona-ba Singapura halo kanselamentu ba Timor-Leste (TL) nia adezaun ba membru ASEAN ne’e laloos, tanba dadaun ne’e Governu halo hela preparasaun.
Governante ne’e klarifika, Ministru Negósiu Estranjeiru ASEAN nian iha reuniaun foin lalais ne’e, hasai komunikadu ida ne’ebé sita pontu 88, hateten kona-ba pozisaun no preparasaun TL nian, la’os kansela.
“Konserteza informasaun ne’e laloos, presiza buka informasaun ne’ebé kredível, di’ak liu lalika halo notísia ne’ebé mak falsu, ne’e mos la di’ak ba ita-nia país, ne’e mós prejudika ita-nia kooperasaun ho nasaun sira hosi ASEAN,”dehan Adaljiza Magno.
Nasaun ne’ebé hola parte iha ASEAN, dadaun ne’e hamutuk 10 mak hanesan, Brunei Darusalam, Myanmar, Kambódia, Indonézia, Laos, Malázia, Filipina, Singapura, Tailándia no Vietnam.Dms
