Primeiru Ministru (PM) Taur Matan Ruak husu ba komunidade sira iha Munisípiu Ermera, atu tuir vasinasaun kontra COVID-19, tanba dadaun ne’e munisípiu refere númeru infesaun COVID-19 sa’e maka’as.
‘‘Governu, no ha’u pesoal husu ba inan-aman sira tenki partisipa iha kampaña vasinasaun, tanba Ermera Munisípiu ikus liu hetan vasina kiik,’’ apela Eis Jenerál ne’e, iha palásiu Presidensiál Bairo-Pité, Kinta (05/08).
Tanba tuir Xefe Governu ne’e, vasina mak dalan úniku luta hasoru pandemia mundiál ne’e, nomos atu fasilita komunidade sira hala’o movimentu livre iha territóriu nasionál.
Atualizasaun dadus ne’ebé GMN asesa husi pájina ofisiál Ministériu Saúde hatudu, Munisípiu Ermera ninia kobertura vasina to’o loron 05 fulan ne’e, , vasina primeira doze atinji deit %13, no segunda doze atinji %1.5.
Maibé dadus vasinasaun ba territóriu nasionál doze dahuluk %40.6, no doze daruak atinje ona %14.4 husi vasina AstraZeneca no Sinovac.
Dadus evolusaun surtu COVID-19 ba Munisípiu Ermera, rejista tan kazu pozitivu foun coronavirus 27, nune’e kazu ativu aumenta ba 616, rekoperadu 147.
Atualizasaun jerál ba territóriu nasionál kazu konfirmadu foun pozitivu COVID-19 hamutuk 80, rekuperadu 14, kazu ativu 1.160, no kazu kumulativu konfirmadu 11.225.Dms
