Primeiru Ministru (PM), Taur Matan Ruak hateten, atu lori nasaun Timor-Leste ba dezenvolvimentu ida di’ak no prósperu ba povu tomak, presiza ema ne’ebé matenek.
“Harí nasaun, dezenvolve nasaun ne’e servisu todan, tan ne’e ita persiza ema matenek, saúde di’ak hodi servisu”, dehan PM Taur iha nia diskursu iha lansamentu prémiu nasionál nutrisaun, Segunda ( 09/08), iha Díli, relasiona ho Ajénsia Internasionál ba Programa Ai-han Mundíal, apoia fundu rihun USD 100 ba Gabinete Apoiu Sosiedade Sivíl iha Gabinete Primeiru Minisitru nian, atu tulun programa Governu nian ba redús problema má nutrisaun iha Timor-Leste.
Primeiru Ministru, Taur Matan Ruak hatete, esforsu ne’e kontribui ba dezenvolvimentu nasionál, tanba Estadu presiza sidadaun ne’ebé forte iha fíziku nomos kapasidade.
Koordenadór Gabinete PM apoiu Sosiedade Sivíl, Filipe da Costa, akresenta, lansamentu ne’e, hodi kontinua advokasia ba hadi’ak nutrisaun no inseguransa ai-han TL.
“Premiu nutrisaun nasionál ida ne’e ita halo, atu rekoñese atividade kreativu no inovativu ne’ebé líder komunitáriu sira, grupu feto sira, grupu joven sira, grupu agrikultór sira, no sira ne’ebé grupu suporta inan halo ona, hodi hadi’ak situasaun má nutrisaun no inseguransa ai-han iha komunidade”, tenik Koordenadór ne’e.
Inskrisaun ba prémiu nutrisaun PM ne’e, sei loke ba kategória 5 mak hanesan, grupu feto, grupu suporta inan husi Ministériu Saúde, grupu juventude no grupo to’os na’in.
Oportunidade ne’e loke ba suku hotu-hotu iha territóriu laran, no tinan ne’e kritéria nomeasaun diferente ho prémiu ne’ebé oferese ona iha tinan hirak liu ba.Eca
