Primeiru Ministru (PM), Taur Matan Ruak, hateten, posibilidade Governu sei aplika sistema hanesan ho Estadu Unidu Amerika (EUA), ne’ebe la autoriza nia Funsionáriu Públiku (FP) sira tama servisu, bainhira laiha kartaun vasinasaun.
Taur Matan Ruak argumenta, dalan úniku atu kombate COVID-19, mak liu husi vasina, tan ne’e ejize FP sira ne’ebé atu tama servisu tenki aprezenta kartaun vasinasaun, sei laiha kartaun vasina sei la autoriza tama servisu.
“Por ezemplu iha estadus unidus, empreza sira só servisu funsionáriu ne’ebé vasina, ida ne’ebé laiha, hela iha uma, até hasai nia husi servisu, provavelmente iha Timor ita sei uza ida ne’e. Iha tempu badak, Governu sei ezize ba funsionáriu públiku (FP), hotu-hotu ne’ebé servisu Estadu, só tama servisu bainhira sira iha kartaun vasina nian,” hateten Xefe Governu, iha SAMES, Kampung Alor, Dilí (11/08).
Antes ne’e reuniaun Konsellu Ministru (KM), iha fulan Maiu, tinan ne’e, aprova ona rezolusaun kona-ba kampaña vasinasaun, ne’ebé define vasina kompleta ka parsiál, nu’udar kritériu atu adota iha administrasaun públika sira.
Tuir dadus, sidadaun iha teritóriu Timor laran tomak, ne’ebé simu vasina doze dahuluk atinje ona %43.4, ho totál ema 443,582, enkuantu doze daruak foin atinje %15.3Ags
