Uniaun Movimentu Demokrátiku Patriótiku (UMDP), konsidera, Postu Administrativu Ataúro la prienxe kritéria atu sai Munisípiu ketak.
Prezidente UMDP, Hugo Lourenço, esplika, postu ida atu nakfilak sai Munisípiu tenke iha populasaun ne’ebé tenke liu rihun sanulu, no iha Postu Administrativu balun iha suku sanulu resin, maibé la sai Munisípiu.
“Agora Ataúro iha Suku 5 deit no nia-nia populasaun la to’o rihun 10, oinsa Governu bele transforma Ataúro sai Munisípiu ida,” dehan Hugo Lourenço, Sesta (06/08) iha Mascarenhas-Díli.
Hugo afirma, atu forma Ataúro sai Munisípiu tenke retornu ne’ebé diak, husi rekursu natural sira, nune’e bele kontribui ba hasa’e reseita ba kofre Estadu.
“Kuandu tau osan ne’e, osan ba uza halo nusa? Presiza osan hira? Retornu mai fali ka lae? Ita bele garante sustentabilidade ka lae? Tanba ne’e mak ami dehan lei ne’e labele,” nia afirma.
Movimentu ne’e mós konsidera aprovasaun lei númeru 14/2021 ne’e, hanesan motivu polítiku, tanba iha K-RDTL artigu 5, define Oe-cesse no Ataúro iha tratamentu Administrativu no ekonómiku espesiál la’os tratamentu espesiál iha ámbitu divizaun administrativa territóriu.
“Ba ami ho alterasaun ne’e ho motivu polítiku no interrese grupu oan ida nian” kestiona Porta voz UMDP,Carolino de Oliveira.
Alterasaun daruak husi lei númeru 11/2009, loron 7 fulan Outobru, kona-ba Divizaun Administrativa Territória ne’e atu muda estatutu Ataúro sai Munisípiu, nomós postu ida iha Hatulia fahe ba rua Hatulia A, Hatulia B, no Loré sei hari’i postu Administrativu.Fel
