GMN TV Politika FRETILIN kontinua ezije forma KIP

FRETILIN kontinua ezije forma KIP

0 views

[:tl]

Deputadu bankada opozisaun Fretilin iha Parlamentu Nasionál (PN) kontinua ezije meja PN atu forma Komisaun Inkéritu Parlamentar (KIP), hodi halo investigasaun ba projetu 142 ne’ebé asina husi Konsellu Administrasaun Fundu Infraestrutura (CAFI_silga iha portugés) iha fulan Jullu, tinan 2017.

Vise Xefi bankada FRETILIN, Deputadu Francisco Branco, haktuir,  rekerimentu inkéritu ne’e, tuir loloos deside ona iha tempu loron 8, maibe liu ona bankada seidauk hetan informasaun husi Prezidenti PN konaba desizaun ne’e.

Deputadu ne’e afirma tan, Prezidenti Parlamentu Nasionál obrigatoriamente tenke deside hodi forma komisaun inkéritu ne’e, tanba rekerimentu ne’e asina husi ema na’in 15 bazeia ba lei rejimentu parlamentar.

“Iha lei inkéritu parlamentar obrigadu ba Prezidenti PN atu deside, no forma komisaun, só kuandu lato’o númeru ida ne’e mak tenke lori ba plenária atu deside, maibe ida ne’e obrigatoriamente tenke forma duni komisaun inkéritu”,dehan Deputadu Francisco Branco ba jornalista iha PN, Kinta(27/09/2018).

Deputadu opozisaun ne’e raelsa tan, iha faze dahuluk nian, bankada FRETILIN sei konsentra ba projetu 142 ne’e, hafoin halo inkéritu ba projetu sira seluk ne’ebé gasta osan durante governasaun tinan 10 nia laran.

“Inkéritu ne’e nakloke hotu kedan, ba tinan 10 ne’e. Se hakarak ita halo hotu kedan, maibe kapasidade no rekursu umanu inklui rekursu finanseiru mós lato’o, maibe ida ne’e bankada sira seluk bele inisiativa ba, ami agora konsentra lai ida ne’e, depois ne’e hotu mak bele inkéritu parlamentar ba sira seluk”,hateten deputadu Branco.

Hatan ba ezijensia husi deputadu FRETILIN ne’e, Prezidenti Parlamentu Nasionál (PPN), Arão Noe de Jesus Amaral, klarifika, nia parte sei harii komisaun inkéritu ne’e, bazeia ba rekerimentu ne’ebé rekere husi bankada opozisaun sira.

“Prosesu sei la’o, maibe informasaun ne’e mak halo públiku pániku de’it. Loloos ne’e lahanesan ne’e. Ita hanoin katak orsamentu ba projetu sira ne’e hanesan ne’e hotu, maibe ezijensia polítika depois mak ita deside, rekerimentu tama ona, hodi forma komisaun inkéritu ne’e”,konfirma Prezidenti PN.

Kona-ba atu halo investigasaun ba projetu hotu iha Timor-Leste, Prezidenti PN, Arão Noe, subliña, ne’e depende bankada Parlamentar ida-idak nia vontade, maibe tenke bazeia kriteriu iha rejimentu parlamentar.

“Sasán hotu ita hakarak halo, maibe última óra ita labele halo buat hotu, maibe importante mak Tribunal de Contas halo tiha ona auditoria planu inisial 2014 no 2015, presiza mós halo auditoria ba 2016, 2017 no 2018 nian iha ZEESM nian, nune’e bele kompleta tiha klareza ba públiku. Auditoria sira seluk, kabe ba bankada ida-idak nia direitu, se tama mai priense kriteriu ne’ebé iha rejimentu hateten, no lei inkéritu parlamentar, ne’e ha’u sei admiti tuir lei, desizaun ikus liu líder bankada sira mak sei deside, no plenária mak sei pronunsia”,tenik Líder másimu V lejislatura ne’e.

Rekerimentu inkéritu Parlamentar ne’e, rekere ba meja Parlamentu Nasionál, husi deputadu bankada opozisaun FRETILIN, iha loron ikus diskusaun Orsamentu Jeral Estadu (OJE) ba tinan 2018 nian, loron 7, fulan Setembru, tinan ne’e, hodi nune’e haree kualidade no legalidade projetu 142 ne’ebé asina husi CAFI iha tinan 2017.Say

[:]


Banner

Foto

Notisia Ikus

Singapura mak trava TL tama ASEAN, LUGU: Horta bele konvense

May 18, 2022
Diplomata senior Timor-Leste, José Luis Guterre...

Delegasaun Angola hasoru PR eleitu

May 18, 2022
Prezidente Repúblika (PR) eleitu, José Ramos H...

PR Lú Olo: Tempu ona atu halo revizaun ba K-RDTL

May 18, 2022
Prezidente Repúblika (PR), Francisco Guterres L...

PN aprova Projetu-Lei responsabilidade PR iha finál globál

May 17, 2022
Parlamentu Nasionál (PN) Kinta Lejislatura, apr...

PR Lú Olo kondekora veteranu 83

May 17, 2022
Prezidente Repúblika (PR) Francisco Guterres L...
1 2 3 727

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker