Reprezentante povu iha Parlamentu Nasional (PN), husi bankada FRETILIN, Marito Mota, konsidera funsionariu Ajensia Dezenvolvimentu Nasional (ADN) balun riku matak, tanba livre halo projetu.
refleção
“Ita haree katak funsionariu Ajensia Dezenvolvimentu Nasional (ADN) balun foin maka sai funsionariu de’it, sira riku matak teb-tebes, iha funsionariu ida ninia uma andar 3, iha pisina, no bar iha laran, tanba ne’e ita la hatene polítika Ajensia Dezenvolvimentu Nasional (ADN) ho Ministériu Públiku (MP) ne’e oinsa,” deputadu bankada FRETILIN, Marito Mota, liu husi ninia intervensaun polítika ba debate OJE faze espesialidade, iha (PN), Kinta (06-09-2018).
Nia akresenta katak, tuir observasaun ne’ebé iha ema Indonesia barak maka servisu iha ADN no kuandu iha vizita ruma sira maka kuaje atende malu de’it.
“Tanba iha kontratu husi bens servisu ne’e maka funsionariu sira ne’e livre iha projetu, funsionariu ADN rasik bele desidi projetu no sira bele iha kompañia para halo servisu,” hatutan deputadu bankada FRETILIN ne’e.
Tuir deputadu bankada FRETILIN, Antoninho Bianco, katak, funsionariu ADN balun moris di’ak loos, maibé la hatene nusa maka sira-nia moris bele iha mudansa bo’ot hanesan ne’e.
“Ha’u hatene muito bem ADN nia servisu balun, maibé ita bele dehan enjiñeiru sira ne’ebé servisu, sé servisu de’it ho sira-nia osan la hidup mewah, tanba sira nia osan la to’o US$1000, ema enjiñeiru sira balun servisu durante tinan 7 de’it, nem salariu US$1000,” relata Antoninho Bianco.
Deputadu bankada FRETILIN, Marito Mota sujere mós ba Governu atu klarifika kona-bá 95 projetu ne’ebé maka sei hetan pagamentu no oinsa ho 48 projetu ne’ebé mosu iregularidade.
Hatán ba preokupasaun ne’e, Ministru Estadu Prezidénsia Konsellu Ministru (MEPKM), Agio Pereira, deklara, realidade funsionariu ne’ebé ADN iha mai husi bens servisu hotu, laiha funsionariu públiku.
“De facto funsionariu ADN mai husi bens servisu hotu, laiha funsionariu públiku, ne’e uluk desizaun polítika ida, tanba dalaruma funsionariu públiku maka tama iha ADN maka la hatudu kapasidade, asuididade, disiplina no rezultadu traballu pratikamente imposivel atu hasa’e tan, agora bens servisu kontratadu sira iha fleksibilidade oitoan ka bele troka, tanba laiha resposta ba garantia kualidade servisu,”haktuir Agio Pereira.
Entretantu dau-daun ne’e rekursu umanu ADN ninian iha 19, hanesan Diretor Jeral, Adjuntu Diretor, Diretor Nasional, Xefi Departamentu, Koordenador Munisípiu, Tékniku Verifikasaun, Tékniku Edifisiu, Tékniku Ponte no Estrada, Tékniku Eletrisidade, Tékniku PNU, Tékniku IT, Tékniku Laboratoriu.ves
