GMN TV Politika OJE ba PN bo’ot aprovadu, PPN hetan krítika

OJE ba PN bo’ot aprovadu, PPN hetan krítika

Orsamentu Jeral Estadu (OJE) 2018 ba Parlamentu Nasionál (PN) ho montante millaun US$ 10.3 maske hetan krítika maka’as husi deputadu bankada opozisaun sira iha PN, maibé ikus mai hetan aprovasaun iha espesialidade, ho votus maioria.

Deputadu opozisaun sira hato’o krítika ba sira-nia orsamentu rasik, tanba opozisaun sira konsidera, orsamentu ba Parlamentu Nasional bo’ot liu.

Opozisaun sira mós konsidera, Prezidenti Parlamentu Nasional (PPN), Arão Noe, hasa’e orsamentu Parlamentu nian  laiha koñesimentu husi Konsellu Administrasaun PN no Konsellu Ministru.

Deputadu bankada FRETILIN, Antoninho Bianco, hateten orsamentu Parlamentu Nasional ho montante boot ne’e, sei ezekuta la hotu, tanba tempu limitadu tebes.

“Iha momentu Konsellu Administrasaun ne’e, ha’u dehan, Governu fó ona osan milaun US$ 9.1 ne’e, ita labele aumenta tan, tanba ita-nia kapasidade ezekusaun iha orsamentu duodésimu ne’e mós la ezekuta barak, agora ita hasa’e ba millaun US$ 10.3, sa tan proposta ne’e la liu tan husi konsellu ministru atu aprova, ida ne’e lalos,”relata Antoninho Bianco iha plenária PN, Sesta (01/09).

Nia afirma, tuir lolos PN mak sai ezemplu ba orgaun sira seluk, maibé iha OJE 2018 ne’e, Parlamentu Nasional hatudu ezemplu sala.

Alende ne’e, deputadu Adriano do Nascimento husi bankada Partidu Demokrátiku (PD) husu esplikasaun ba meja PN kona-ba, tanba saida mak OJE-PN nian aumenta ba millaun US$ 10.3.

Hatan ba preokupasaun ne’e, Prezidenti Parlamentu Nasional, Arão Noe, justifika katak, verba husi envelope fiskal ne’ebé mai husi Governu PN nia orsamentu millaun US$ 9.1.

“Orsamentu Parlamentu Nasional ita ba to’o millaun US$ 9.1, ita la hetan, tanba orsamentu normal Parlamentu nian kada tinan ne’e millaun US$ 15. Husi osan millaun US$ 10.3 ne’e,  durante fulan Juñu mai to’o agora, Parlamentu Nasional gasta tiha ona millaun US$ 4.6. ida ne’e signifika katak, husi osan millaun US$ 10.3 ne’e, ita gasta tiha ona millaun US$ 4.6, osan restu ba Parlamentu atu uza ba fulan hat ne’e, hela de’it millaun US$ 5 resin,”afirma Arão Noe.

Kona-ba orsamentu ba resesu, Arão Noe, dehan, OJE tinan ida ne’e, PN la prevé osan ba resesu nian, tanba durante fulan haat nia laran ne’e, PN sei laiha resesu.

“Komisaun barak mak dada is kona ba asesores atu ajuda hodi fó pareser ba komisaun idak-ida nian, tanba ne’e mak ami hanoin katak, diak liu mantein ho montante osan ida ne’e, para ita bele buka asesor balu tan ba komisaun sira,” afirma Arão.

Kona-ba osan viajen estranjeiru, PPN esplika, tinan ida ne’e PN la prevé osan barak ba viajen estranjeiru, tanba laiha estudu komparativu.

Maske orsamentu Parlamentu Nasional tinan ida ne’e nian hetan kontesta maka’as husi deputadu sira, maibé ikus mai orsamentu Parlamentu Nasional nian hetan ona aprovasaun ho votus maioria a favor 51, kontra 0 no abstensaun 11.cos


Banner

Foto

Notisia Ikus

Portu Díli sei transforma ba zona turístika

July 30, 2021
Primeiru Ministru (PM) Taur Matan Ruak, hatete b...

PN ezije Governu responde povu nia halerik durante pandemia

July 30, 2021
Reprezentante povu sira iha Parlamentu Nasionál...

PPN la admite kansela diskusaun lei EOJF

July 29, 2021
Prezidente Parlamentu Nasionál (PPN) Aniceto Gu...

Governu aplika SS iha munisípiu Ermera no Díli ba semana rua

July 29, 2021
Governu liu husi reniaun Konsellu Ministru, Kuar...

PPN Aniceto promete sei altera LPV antes mandatu remata

July 29, 2021
Prezidente Parlamentu Nasional (PPN), Aniceto Gu...
1 2 3 622

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker