GMN TV Politika PD apoiu PR halo viajen ba rai liur ■ Abel Pires: Antes vizita, PR tenki promulga OJE 2018

PD apoiu PR halo viajen ba rai liur ■ Abel Pires: Antes vizita, PR tenki promulga OJE 2018

1 views

Reprezentante povu iha uma fukun Parlamentu Nasional (PN), husi  bankada opozisaun Partidu Demokrátiku (PD), apoia Prezidente Repúblika (PR), Francisco Guterres ‘Lú Olo’ atu halo vizita Estadu ba rai liur, tanba husi vizita ne’e bele promove Timor-Leste iha mundu.

“PD fó apoiu vizita Estadu PR ba rai liur, tanba uluk ita sempre husu PR tenki halo vizita ba rai liur no tanba ho vizita Estadu PR nian ne’e, lori nafatin Timor iha mapa mundu ne’e, sé ita hakarak impata fali ne’e la loos,” haktuir deputadu bankada PD, Mariano Assanami Sabino ba jornalista sira iha PN, Díli, Kinta (13-09-2018).

Nia esplika, razaun PD fó apoiu ba PR Lú Olo halo vizita ba rai liur ne’e, tanba PR reprezenta Estadu no nasaun iha rai ne’ebé maka nia vizita ba, tanba ne’e maka nuudar reprezentante povu PD fó apoiu.

“Ita labele kahur entre polítika rai laran ho reprezentasaun ita tomak nian, buat ne’ebé maka iha rai laran ne’e internal ita nian, ita labele impata fali PR nia vizita, apalagi vizita balun ne’ebé ho karakter Estadu ne’e ema prepara, para ita labele hatudu ita nia frazilidade, maka ita tenki fó apoiu, tenki hatene tau buat ida-idak iha ninia fatin,” afirma Assanami.

Nia akresenta, kona-bá membru Governu ne’ebé seidauk kompletu no OJE 2018 ne’ebé seidauk promulga, ne’e prosesu internal ida, presiza halo diskusaun no buka dalan, labele iha jalan buntu no labele hotu-hotu hein de’it.

“Ita tenki sai husi ita nia problema ne’e, mezmu problema no dezafiu iha, ita tenki hakat, labele para no hein, ita tenki tau ketak-ketak asuntu ne’ebé maka partidu, Governu no rai laran, asuntu PR hanesan simbólu Estadu no Xefi Estadu, reprezenta ita hotu ba vizita,” realsa deputadu PD, Mariano Assanami Sabino.

Tuir deputadu bankada Partidu Libertasaun Popular (PLP), Abel Pires, sujere ba PR Lú Olo atu foti desizaun uluk ba OJE 2018 ne’ebé PN entrega ba ne’e, tanba orsamentu ba vizita Estadu PR ninian no atu sustenta mákina Estadu mós seidauk hetan promulgasaun, oinsa maka PR bele halo viajen ba rai liur.

“Depende ba orariu vizita Estadu PR ninian ne’e, sé sai ba liur kleur, ne’e sai preokupasaun ami nian no bele mós sai fatór importante ba mai atu tetu, agora promulgasaun OJE 2018 mós seidauk klaru, diak liu ita lalika koalia buat seluk, ita haree maka buat importante sira kona-bá povu nia moris, roda ekonomia la’o ka la’e, tanba ita nia mákina Estadu ne’e depende ba despeza Governu, sé OJE 2018 la pasa, roda ekonomia mós para,” haktuir Abel Pires.

Entretantu antes ne’e, iha loron 9 Jullu, liu husi debate iha uma fukun PN, bankada Aliansa Maioria Parlamentar (AMP) desidi kansela vizita Estadu PR Lú Olo ba Portugal, ho votus a favor 29, kontra 35 no abstensaun 0. ves

 


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker