Prezidenti Parlamentu Nasional (PN), Arão Noe, kongratula ho desizaun Prezidenti Repúblika (PR), Francisco Guterres ‘Lú Olo’, tanba urjentimente promulga ona proposta Orsamentu Jerál Estadu (OJE) 2018 ho montante billiaun US$ 1.2, ne’ebé VIII Governu propoin.
“Ha’u em nome PN agradese ba PR, tanba ho promulgasaun OJE 2018, ita hakotu ona duodesimal ne’ebé ita uza durante fulan 9 nia laran, iha tinan 2018”,Prezidenti PN ne’e ba jornalista sira iha uma fukun PN, Kinta (27-09-2018).
Nia esplika, Kinta (27/9) horiseik dader kuaze tuku 9 OTL, PN simu tiha ona dekretu lei númeru 2/V/2018 ka proposta OJE 2018 ho karakter urjensia, tanba ne’e pesoalmente husu ba Gráfica Nacional halo publikasaun ho karakter espesial, atu nune’e bele tama em vigor kedas, para Governu bele ezekuta kedas.
“Ha’u hein katak ho tempu kultu fulan 3 ne’e, Governu halo esforsu máximu para ezekuta, hodi selu tiha dívida no kompromisu ne’ebé Governu halo no liu-liu ba direitu ba funsionáriu kontratadu sira ne’ebé la simu osan, tanba orsamentu la to’o no ho direitu regalias seluk ba Estadu ninian funsionamentu, por ezemplu ba Xefi Suku sira nian, tanba osan la to’o, sira la simu sira-nia direitu”,haktuir Arão Noe.
Xefi órgaun lejislativu ne’e espera, Governu sei halo esforsu máximu, atu selu tiha nesesidade ba funsaun públika ninian, hanesan mós ba órgaun eleitu sira, hanesan Xefi Suku no administrasaun públika sira.
“Sé ohin (27/9) Jornal da República publika kedas, ne’e lei ne’e entre em vigor, Governu bele halo kedas levantamentu orsamentu husi fundu petrolíferu, hodi atende ba nesesidade Estadu nian”,realsa Prezidenti PN ne’e.
Nune’e, Vise Xefi bankada FRETILIN, Francisco Miranda Branco, apresia mós desizaun PR Lú Olo ne’ebé promulga OJE 2018 ne’e. Maibé, nia dehan, FRETILIN mós sei uza kompetensia komisaun E, ne’ebé trata asuntu infra-estrutura, hodi halo akompañamentu ba ezekusaun OJE 2018.
“Kona-bá ezekusaun, dezde uluk kedas, ami kestiona kapasidade Governu nian, atu ezekuta orsamentu ida bo’ot tebes, ami sei uza komisaun permanente espesializada iha infraestrutura nian, atu halo akompañamentu ba liquidas akompañamentu ba liquidação de compras”, haktuir Vise Xefi bankada FRETILIN ne’e.
Entretantu proposta OJE 2018 ho montante billiaun US$ 1.2 ne’e, pasa iha uma fukun PN, iha loron 7, fulan Setembru, iha final global ho votus a favor 42, kontra 9 no abstensaun 14.ves
