GMN TV Politika PR Lú Olo: Tamba sa membru Governu nain 3 lakohi simu pose

PR Lú Olo: Tamba sa membru Governu nain 3 lakohi simu pose

0 views

Prezidenti Repúblika (PR), Francisco Guterres ‘Lú Olo’, deklara, husi lista proposta membru Governu 43 ne’ebé hato’o  husi Primeiru Ministru, Taur Matan Ruak, Prezidenti Repúblika nomeia no fo pose ona membru Governu nain 32 haree ba relasaun ho responsabilidade institusional, maibe Xefi Estadu la kompriende tambasa membru Governu nain tolu seluk ne’ebé PR nomeia ona lakohi atu simu pose.

“Ha’u hatete sai fila fali iha ne’e, ha’u-nia hanoin, ne’ebé ha’u hato’o ona ba Primeiru Ministru, iha ami-nia diálogu, ne’ebé ha’u halo nafatin ho laran  nakloke no mos, katak ha’u husu atu tetu, sukat, pondera didiak, kandidatu sira ne’ebé Primeiru Ministru propoin, maibe  ha’u seidauk nomeia. Tambasa mak membru Governu nain 3, ne’ebé propoin husi Primeiru Ministru no PR  nomeia ona, maibe lakohi atu simu pose”deklara PR Lú Olo husi nia diskursu abertura ba sesaun solene V lejislatura iha Parlamentu Nasional, Segunda (17/09/2018).

Xefi Estadu ne’e akresenta, tuir konstituisaun la iha ema ida mak bele interfere, halo presaun ka ezije ba titular ne’ebé de’it husi orgaun soberania sira kona-ba sira nia kbi’it konstitusional fo ba Prezidenti Repúblika, atu foti desizaun polítika kona-ba nomeasaun membru Governu ne’ebé propoin husi Primeiru Ministru, Prezidenti Repúblika foti desizaun hafoin sukat klean, hatene lolos ona katak sei proteje interese nasional.

“Ha’u fiar katak, liu husi diálogu entre Prezidenti Repúblika no Primeiru Ministru, ne’ebé hala’o iha ambiente polítiku ida ne’ebé ami nain rua haree hamutuk oinsa servi di’ak liu ita-nia povu no nasaun, tuir orgaun soberania, titular ida-idak ninia kompetensia, ami  nain rua bele hetan kandidatu seluk ne’ebé ha’u bele nomeia no fo pose atu kompleta VIII Governu Konstitusional, tuir prosedimentu ida ne’e la sees husi ita-nia konstituisaun no lei sira seluk. Estadu nian, tuir lei haruka, no interese pesoal ka polítika partidaria la tama iha desizaun, nu’udar Prezidenti Repúblika, atu nomeia ka la nomeia membru Governu ne’ebé propoin husi Xefi Governu,”afirma PR Lú Olo.

PR Lú Olo subliña,  haree ba nia kbi’it konstitusional, nia la halo buat hotu-hotu atu diálogu ne’e  iha susesu, la’os de’it ba ohin loron, maibe ba periodu mandatu tomak Governu ida ne’e nian.

“Ita bele  haluha katak, Governu tomak ne’ebé xefia husi Primeiru Ministru, tenki hatan ba Parlamentu Nasional, tenki hatan mos ba Prezidenti Repúblika, tamba Governu tenki hatan ba Prezidenti Repúblika, ha’u sei tau aas ha’u-nia relasionamentu ho Primeiru Ministru nu’udar Xefi Governu, tamba ne’e, mak  semana-semana, ami nain rua hetan malu hodi haburas relasaun institusional, liu husi  diálogu,  oin ba oin,” realsa PR Lú Olo.

Membru Governu nain tolu ne’ebé PR nomeia ona, maibe lakohi simu pose ne’e mak hanesan, Alfredo Pires, nu’udar Ministru Petroleu no Minerais, Samuel Marçal, nu’udar Ministru Planeamentu Investimentu Estratéjiku, no mos Sekretariu Estadu Peska, Rogério Mendonça.

Entretantu tuir PR Lú Olo, iha sesaun solene abertura primeira sesaun lejislativa V lejislatura PN ne’e, Parlamentu Nasional foti inisiativa simu Prezidenti Repúblika  ho sentidu unidade Estadu, ne’ebé respeita relasaun ba malu, nu’udar orgaun soberania,  ne’ebé presiza tulun malu atu hala’o hamutuk  Estadu no interese nasional, ho ida-idak ninia kompetensia.

“Ha’u koalia ba maluk Timor oan  ida-idak,  ba maluk hotu, sidadaun  doben hotu, ba reprezentante povu nian, ba membru Governu, iha sesaun solene ida ne’e, hodi loke sesaun dahuluk ba V Lejislatura Parlamentu Nasional, iha loron 17 fulan Setembru tinan 2018, hanesan mos sesaun solene sira hala’o  hori uluk, Parlamentu Nasional nia sesaun lejislativa dahuluk hahú mos ho mensajen ida husi Prezidenti Repúblika, tuir artigu 86 alinea Konstituisaun RDTL iha iha kompetensia atu hato’o lia tatoli ba Parlamentu Nasional no mos ba nasaun,”dehan PR Lú Olo.

Xefi Estadu ne’e  senti onradu tebes mai Parlamentu Nasional, hodi koalia  ho deputadu sira, no ba nasaun. Tamba nia prejide hori uluk  Asembelia  Magna ida ne’e, nia senti  hanesan nia vizita iha  família uma kain, relasaun  espesial ida ne’e, hamutuk ho nia kbi’it konsitusional, lori nia akompaña, ho laran haksolok  liu tan , oinsa Parlamentu Nasional  ha lalo nia kna’ar.

“Mai koalia iha uma fukun ida ne’e, sai ona aktu simbóliku, polítiku baibain ida, no tama ona iha ita-nia tradisaun institusional, iha ita-nia relasaun ba malu, nu’udar orgaun soberania, di’ak tebes ba ita-nia demokrasia, nune’e ha’u hakarak sauda deputadu sira, tamba simu misaun parlamentar a’as  tebes, misaun  ida ne’ebé ezije  ita bo’ot sira tenki  reprezenta povu Timor Leste, hala’o parlamentu nasional ninia kna’ar  lejislativu no fiskalizador,”relasa PR.

PR Lú Olo akresenta, nia fiar katak, relasaun insitutsional ne’e haktuir  regra demokrasia nian, tuir konstituisaun  haruka, nune’e orgaun soberania ida-idak bele hadia a’an  ba bebeik, atu lori benefisiu ba sidadaun sira no dezenvolvimentu ba nasaun.Oly


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker