Bankada Congresso Nacional da Reconstrução de Timor (CNRT), la konkorda Governu implementa tan Estadu Emerjénsia (EE) ba da-lima, tanba la iha nesesidade.
Vise Xefe Bankada CNRT, Patrocinio Fernandes, deklara, lá nesesáriu ona atu Prezidente Repúblika (PR), implementa tan Estadu Emerjénsia ba-dalima.
Vise Xefe Bankada opozisaun ne’e hateten, Estadu Emerjénsia hirak ne’e nu’udar meius ida Governu ni’an hodi proteje-an.
“Laiha nesesidade razaun saida para atu bele justifika katak presiza Estadu Emerjénsia CNRT haree katak estansaun foin dadauk liu ba kotuk ba faze dahaat (datolu-red) ninian CNRT hatete ona katak laiha nesesidade saida tan agora laiha nesesidade ba Estadu Emerjénsia razaun saida ita bebeik tau Estadu Emerjénsia, CNRT la aseita tanba haree katak Estadu Emerjénsia sira ne’e karik hanesan razaun polítika de’it, tanba laiha evidensia ruma hatudu ba ita katak ita iha duni situasaun ida ne’ebé presiza atu implementa duni Estadu Emerjénsia ne’e hanesan razaun polítika para atu bele proteje intresese ruma karik ne’e bele”, dehan, Vise Xefe Bankada CNRT, Patrocinio Fernandes iha PN, Tersa (01/09).
Primeira Vise Prezidente Parlamentu Nasionál), Maria Angelina Sarmento hateten, kona-ba kestaun ne’e, nia parte seida’uk bele halo deklarasaun ruma, tanba pedidu refere sei diskuti iha plenáriu estraordináriu.
“Ha’u hanoin ida ne’e kuandu iha debate estensaun Estadu Emerjénsia mak ita bele rona sira nia opiniaun por-enkuantu ha’u seida’uk bele adianta, tanba ami rasik mós seida’uk rona seida’uk hatene mais ou menus Governu nia razaun hodi husu tan estensaun ba Estadu de Emerjénsia ne’e nia baze mak saida ne’ebé ba agora dadaun ha’u seidauk bele deklara pozisaun husi bankada Governu atu bele afavor ka la’e i pozisaun husi bankada CNRT ni’an hakarak atu kontra Estadu de Emerjénsia ha’u seidauk bele adianta”,deklara, Primeira Vise Prezidente Parlamentu Nasionál, Maria Angelina Sarmento.
Maibé iha Segunda 31 fulan Agostu liu ba Prezidente Repúblika konvoka ona, reuniaun Konsellu Estadu, hodi rona opiniaun kona-ba presiza ka lae atu Estende tan Estadu Emerjénsia no pedidu ne’e sei haruka ba Parlamentu Nasionál hodi husu autorizasaun.
Razaun mak atu fasilita Governu, bele halo kontrolu ba transmisaun surtu COVID-19, tanba nasaun viziñu Indonézia lor -loron kontinua rejista númeru COVID-19.
Pedidu estensaun Estadu Emerjénsia, sei diskuti no konfirma votus, iha kinta loron tolu fulan ne’e, hodi halo aprovasaun liu husi, deliberasaun komisaun permanente.
Nune’e mós Estadu Emerjénsia dahaat, sei remata iha fulan ne'e no posibilidade Governu sei estende tan ba fulan ida.Ina
