Deputada bankada CNRT, Carmelita Moniz, konsidera esplikasaun husi Xefe Gabinete Primeiru Ministru (PM) kona-bá ezekusaun orsamentu diferénsia iha portál transparénsia, tanba rúbrika kapitál meñor atu atende ba nesesidade urjénsia hodi sosa ekipamentu ba media Gabinete PM, maibé realidade bainhira asesu iha portál transparénsia Gabinete PM la ezekuta orsamentu hodi sosa ekipamentu ba média.
Ho nune’e, ezekusaun orsamentu rúbrika kapitál meñor boot liu hodi sosa kareta ho montante USD rihun 68.
“Iha portál tranparénsia iha rúbrika kapitál meñor Gabinete PM nia ezekusaun zero, maibé tuir esplikasaun husi Xefe Gabinete PM sira ezekuta hodi atende nesesidade urjénsia, hodi sosa ekipamentu ba média iha Gabinete PM. Ami haree iha portál transferénsia ba kapitál meñor la ezekuta (zero), maibé ba komunikasaun ne’e zero, ita tau USD rihun 55, mais ezekusaun zero, ita boot sira la uza”, Deputada bankada CNRT ne’e bainhira komisaun A ho komisaun C hala’o audénsia ho Gabinete PM ba apoiu sosiedade sivíl, Inspesaun Jerál Estadu (IJE) no Konsellu Interministeriál Reforma Fiskal UPMA iha PN, Kuarta (23-09-2020).
Nia afirma, Gabinete PM ezekuta orsamentu barak liu ba sosa kareta, nune’e kontrariu ho esplikasaun katak sosa ekipamentu ba média sira iha Gabinete PM.
“Gabinete PM ezekuta osan barak liu ba sosa kareta, ita boot sira la sosa, saída mak ohin ita boot resposta mai ne’e sosa ekipamentu ba iha komunikasaun USD rihun 68.3, tanba ne’e ezekusaun iha kapitál meñor hamutuk 17.7%“, tenik Carmelita.
Xefe Gabinete PM, Azevido Lourenço Marçal, klarifika, iha rúbrika kapitál meñor halo ezekusaun ba nesesidade urjénsia, hodi sosa duni ekipamentu média ba Gabinete PM.
“Kapital meñor ami husu atende nesesidade urjente sira Gabinete PM hanesan ita iha média Gabinete PM, ekipamentu média sira servisu ho kamera ne’ebé antigun, nune’e labele ajuda ita nia efisiénsia servisu. Alende kamera jornalista gabinete PM laiha mós komputadór, sira uza sira nia laptop pribadu, tanba Estadu laiha fasilidade atu ajuda sira nia servisu. Alokasaun ita husu ba kapitál meñor ne’e atu kobre komputadór balun ba sira ne’ebé atu hala’o funsaun esensiál ne’ebé la hetan tulun bele implika ba servisu”, tenik Azevedo. ety
