Vise Xefe bankada CNRT, Partrocínio Fernandes, hateten, CNRT sei la partisipa iha serimónia prosesu hatúr meza foun hodi troka meza tuan ne’ebé antes ne’e hetan estraga husi deputadu sira iha Parlamentu Nasionál (PN), tanba konsidera problema konstituisaun no lei ne’ebé vigora.
“Akontese meza baku fila ita la rezolve meza ne’e hamulak ita ka rezolve meza ne’e atu harii hikas meza tenke buka nia fukun mak violasaun konstituisaun, PN fatin ba atu halo lei ba abanbainrua ema hotu bele halo la-lais Estadu tuir lei, ohin loron ita sama tiha lei ba rai, ita hanoin atu tau kredibilidade PN ne’e. Maske CNRT la partisipa, maibé la viola rejimentu PN no laiha artigu ida hateten serimónia harii hikas meza foun. Impase polítika ne’e ita bele hakotu ho harii meza karik la presiza prosesu dada naruk, úniku atu hakotu impase polítiku iha Prezidente Repúblika (PR) nia liman, tanba figura ne’ebé atu asegura no garante funsionamentu Estadu ni’an tuir konstituisaun bainhira PR tenta viola konstituisaun laiha dalan atu hakotu impase polítiku”, Vise Xefe bankada CNRT ne’e ba jornalista sira iha PN, Tersa (01-09-2020).
Vise Prezidente PN, Maria Angelina Sarmento, hateten, meza PN baku fila ne’e parte balun defende-an katak sira mak loos, maibé bankada Governu nia parte atu dignifika dignidade PN, liu husi hatúr hikas meza foun.
“Ita koalia kona-bá meza baku fila iha parte ida hateten nia mak loos, iha parte ida defende nia mak sala, maibé posizaun PN oinsa mak atu hatúr fali dignidade PN, liu husi hadia meza PN ne’ebé rahun tiha ona. Maske ida-idak sei hamriik iha nia pozisaun ami mak loos, sira mak sala, maibé ita-nia matadalan mak konstituisaun ho rejimentu PN parte sorin koalia kompeténsia Prezidente PN. ami nia parte atu dignifika fali dignidade PN liu husi hatur hikas meja ita tenke hateke ba oin maioria bele viabiliza governu ho OJE hodi hadia povu nia moris ba oin Maske CNRT la partisipa maibe importante maka iha maoria ida viabiliza “ tenik Angelina
Entretantu meza Prezidente PN ne’e hetan estragus, tanba deputadu sira husi bankada CNRT, FRETILIN, KHUNTO ho PLP hadau malu kadeira iha loron 19, fulan Maiu, tinan ne’e.
Ho nune’e, iha loron 17, fulan Agostu, tinan ne’e, kompañia Zepara Mega Comoro entrega ona meza foun ba PN.
Tuir planu iha loron 3, fulan ne’e, PN sei realiza serimónia kulturál iha loron 4, fulan ne’e, sei halo misa iha Igreja Katedral Díli, hodi husu bensaun husi Igreja. Ety
