Diplomata senior Timor-Leste, José Ramos Horta, iha ona hanoin hodi hakerek karta ba Amu Papa ho Sekretáriu Jeral ONU, António Guterres hodi orienta Igreja iha mundu no organizasaun mundial hirak ne’e atu hapara ona asaun karitativa ba populasaun sira, tanba deputadu matenek boot sira iha Parlamentu Nasional Timor-Leste nian dehan, asaun karitativa ne’ebé líder karismátiku Kay Rala Xanana Gusmão halo durante ne’e hatún dignidade populasaun sira nian.
Horta hato'o kestaun ne'e ba komunidade Suku Dotik, Postu Administrativu Alas, Munisípiu Manufahi, relasiona ho opiniaun balu iha públiku liu-liu deputadu sira ne’ebé matenek loos iha Parlamentu Nasional ne'eba hatete asaun karidade ne'ebé líder karismátiku Kay Rala Xanana Gusmão halo durante ne'e, hanesan hamonu povu nia dignidade.
“Fahe hahán ne’e ha’u rona matenek bo’ot, matenek bo’ot ne’e tanba iha Parlamentu Nasional ne’e, ema matenek deit mak ba iha ne’eba. Ne’e duni matenek bo’ot balu iha Parlamentu ne’e hatete, karidade ne’e hanesan halo lakon fali povu nia dignidade, hau rona ne’e, ha’u hanoin kedas atu hakerek surat ida ba amu Papa para fó ordem ba Igreja hot-hotu iha mundu para karidade, tanba karidade kontra fali ema nia dignidade. Ha’u mos sei hakerek ba Sekretáriu Jeral ONU, António Guterres, favór fó orden ba ajensia ONU hot-hotu iha mundu, iha Timor hanesan UNICEF, PNUD, WFP, sira be fahe hahán ne’e para, tanba ne’e ladiak ba povu nia dignidade, ha’u sei hatete ba Isabel Ferreira, Primeiru Ministru nia señora, ita bo’ot mos halo ona karidade tinan lobuk ida nia laran be halo favór para, ne’e la diak ba povu nia dignidade. Tanba deputadu iha Parlamentu ne’e mesak ema matenek, matenek deit mak ba iha ne’eba, entaun sira koalia, ita rona ne’e. Mas sorte ba Maun Xanana kontinua halo asaun ida ne’e hodi tulun ferik-katuas sira, povu sira”, dehan Laureadu Nobel da Paz, José Ramos Horta, iha semana kotuk fulan ne’e.
Hafoin sorumutu ho komunidade iha suku refere, laureadu novel da paz, Ramos Horta hamutuk ho Kay Rala Xanana Gusmão, kontinua ba Suku Klakuk, Postu Administrativu Fatu-Berlihu, Munisípiu Manufahi.
Iha Klakuk, lider nasionál nain rua ne'e simu direta husi eis ministra justisa, Lucia Lobato, iha ne’ebé rai refere tanba ninia laen orijinaria husi Postu Fatu Berlihu.
Iha suku refere, Xanana ho Horta kontinua distribui nesesidade bázika ba komunidade kbi'it laek sira, inklui mós ba ema ho difisiénsia.
Antes ne’e deputadu balu husi bankada Fretilin, kestiona asaun karitativa Xanana nian ne’e hanesan hatún dignidade povu nian. GMN
