Bankada FRETILIN iha Parlamentu Nasionál (PN), konsidera Governu fó subsídiu ba Jornalista sira hanesan diskriminasaun, tanba fó de’it ba jornalista destaka iha Sentru Integradu Jestaun Krize (SIJK) Merkadu-Lama, maibé jornalista sira seluk ne’ebé destaka iha ministériu sira no fatin seluk la hetan subsídiu ne’ebé refere.
Durante Estadu Emerjénsia (EE) kuaze jornalista hotu hala’o nafatin sira nia kna’ar hodi hato’o informasaun ba públiku, tanba ne’e jornalista hotu iha direitu atu hetan subsídiu ne’e, la’os dei’t ba destakadu SIJK de’it.
“Dekretu ne’ebé aprova no Prezidente Repúblika (PR) promulga kona-bá jornalista front line ne’e ba jornalista sira iha de’it sentru jestaun krize ne’e de’it, maibe jornalista sira ne’ebé durante ne’e akompaña iha primeiru període EE ho segundu EE, sira ne’ebé durante ne’e akompaña ministériu sira ho PN ba munisípiu sira iha situasaun ne’ebé ladun di’ak, maibe ida ne’e la hetan direitu ba subsídiu,” kestiona deputadu bankada FRETILIN, Marito Mota, liu hosi diskusaun relatóriu ezekusaun fundu COVID ho relatóriu dotasaun orsamentu tinan 2020 nian, Segunda (21/09/2020), iha PN.
Hatán ba asuntu ne’e, Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten, Governu halo prosesu bazeia ba lista ne’ebé rekomenda hosi instituisaun média sira, tanba ne’e Governu la halo diskriminasaun.
Nia haktuir, lista sira ne’e prosesa no aprova hotu ona no hein de’it haruka ona ba Minstériu Finansas (MF) atu ezekuta, iha ne’ebá mak ikus liu hodi halo pagamentu.
“Ida ne’ebé mak risku mak tama, maibe ida ne’ebé la risku la tama, maibe lista sira ne’e la’os tur-tur ami simu de’it la’e, lista sira ne’e mós mai duni hosi empreza ne’ebé mak fó servisu ba jornalista ne’e ba SIJK depois mak sentru haruka ba ministériu no ministériu verifika, ikus liu haruka ba MF hodi hein pagamentu,” esplika Francisco.
Antes ne’e Xefe Estadu, Francisco Guterres Lú Olo, promulga ona dekretu lei liña frente sira, hodi envolve mós jornalista nu’udar liña frente hodi prosesa subsídiu. Say
