Governu liu husi Konsellu Ministru (KM), aprova projetu rezolusaun Governu, ne’ebé aprezenta husi, Ministru Prezidensia Konsellu Ministru (MPKM), Fidelis Leite Magalhães, kona-ba programa reforma administrasaun públika periodu tinan 2019 -2023.
Ministru Prezidensia Konsellu Ministru, Fidelis Leite Magalhães hateten, reforma administrasaun públika ne’e ho objektivu atu transforma administrasaun públika, ne’ebé haree liu ba estrutura poder sentral nian.
Governante subliña, halo monitorizasaun, ba implementasaun programa reforma ne’ebé kria komisaun interministerial akompañamentu, ne’ebé prezide husi PCM, no sei integra Ministru no entidade relevante iha material ne’e.
“Programa ne’e antes ne’e hetan ona aprovasaun husi KM iha fulan Fevereiru liu ba no agora aprezenta fila fali tamba iha alterasaun balun, relasiona ho pedidu implementasaun, tamba iha tinan 2020 pratikamente laiha orsamentu no COVID-19 programa balun, previstu atu implementa iha 2020, maibé muda fali ba 2021,” dehan, MPKM Fidelis Leite Magalhães, iha Palásiu Governu, Kuarta (09/09/2020).
Fidelis esplika, antes ne’e la inklui Ministériu Asuntus Ekonómikus, dadaun ne’e iha ona Ministru propriu ba kordensaun asuntu ekonomia, ho ida ne’e inklui fila fali Ministériu refere, tamba programa ne’e mós iha relasaun ho esforsu atu hadia ambienti negosiu.
Governante ne’e hatutan, programa reforma ida ne’e, presiza halo fali aprezentasaun tamba, membru Governu barak mak foun.
Fidelis subliña, ho aprezentasaun ida ne’e, membru Governu foun sira bele apar fila fali, kona-ba saida lo’os mak programa reforma, administrasaun públikas no pretende atu halo.Cin
