Ministra Negósiu Estranjeiru no Kooperasaun (MNEK), Adaljiza Magno, hatete, Governu sei diskute no haree posibilidade reativa fali voo komersiál fulan ida, dala ida, hodi fasilita Timor-Oan sira iha rai-liur fila mai Timor-Leste.
Ministra hato’o lia hirak ne’e, relasionadu ho Timor-Oan ne’ebé oras ne’e iha hela rai-liur hasoru difikuldade atu fila mai Timor, tamba voo komersiál ne’ebé laiha impaktu husi restrisaun sira ne’ebé nasaun hotu iha mundu, inklui Timor-Leste impoen hodi evita propagasaun COVID-19. Tamba ne’e iha tempu besik Governu Timor-Leste sei diskute hodi loke fali voo komersiál entre nasaun seluk.
“Ami tenta hela para atu reativa aviaun komersiál fulan ida dala ida, maibe por ezemplu sira ne’ebe mak hatama proposta iha Europa konsege liu husi Lisboa mai Governu fasilita. Tenta hela se bele reativa fila-fali aviaun komersiál fulan ida dala ida ne’e Ministériu Transporte no Komunikasaun (MTK) Organiza ida ne’e se posível, entaun ita sei la loke loron-loron, maibe fulan ida dala ida atu nune’e sira ne’ebé hela dook estagnado hela iha ne’ebá bele mai fila-fali”, hateten MNEK ne’e hafoin reuniaun Konsellu Ministru (KM), Kuarta (16-09-2020).
Kona-ba estudante Timor-Oan sira ne’ebé oras ne’e iha Israel no labele fila mai Timor, governante ne’e hateten, Governu sei buka meius atu lori fila sira iha tempu besik.
“Ami trata hela, se sira bele mai, mai ho aviaun EuroAtlântico iha posibilidade ami atu akomoda sira iha ne’eba, ami buka hela aprovasaun orsamentu ba ida ne’e. Tamba se labele mai hamutuk ho aviaun ne’e, entaun ami buka meius seluk”, tenik Governante ne’e.
Enkuantu aviaun ne’ebé oras ne’e iha voo ho Timor-Leste mak úniku aviaun ne’ebé aluga husi Programa Alimentar Mundial hodi tula agentes cooperante sira ne’ebé hala’o sira-nia kna’ar iha Timor-Leste. Tuir informasaun husi Programa Alimentar Mundial kontratu aviaun refere to’o deit fulan Outubru no sei la estende, tanba orsamentu laiha. Oct
