Komité Revizaun Orsamentu Polítiku (KROP) sei halo ajustamentu ba proposta ne’ebé aprezenta husi kada ministériu, hodi define loloos Orsamentu Jeral Estadu (OJE) ba tinan 2021.
“Tetu OJE ne’ebé Governu antes ne’e hatur ona ba tinan 2021 billiaun USD1.6 no liu husi agora ita avansa ho billiaun USD1.6 ne’e KROP nia kna’ar iha diskusaun hirak ne’e, halo análiza ba iha proposta hirak ne’ebé mai husi kada ministériu,” Ministru Prezidénsia Konsellu Ministru (MPKM), Fidelis Leite Magalhães, iha Palásiu Governu, Sesta (18/09/2020).
Governante ne’e esplika, antes ne’e liña ministeriál sira, simu ona sira nia tetu, maibé iha ministériu balun husu adisionál KROP ne’e atu bele halo fila-fali ajustamentu, hafoin KROP halo avaliasaun no rezultadu finál lori fila mai Konsellu Ministru (KM).
Fidelis hatutan, enkuantu hafoin KROP halo avaliasaun hotu, ida ne’e mak foin define loloos montante OJE ba tinan 2021 ne’ebé atu aprezenta ba PN, maibé nia montante ne’e labele dok liu husi billiaun USD1.6, tanba ne’e bazeia husi kálkulu ne’ebé Ministériu Finansas (MF) fó.
“Ho kestaun ida estabilidade makro ekonómiku, tanba ba tinan ita gasta montante bo’ot liu karik, orsamentu sei dura to’o tinan hira, liu-liu fundu mina-rai ne’e, ita nia kapasidade atu halo ezekuta ka lae,” tenik Fidelis.
Fidelis subliña, MF konsidera hirak ne’e hotu hafoin aprezenta montante OJE 2021 ne’e, maibé la taka dalan bainhira desizaun KROP ne’e.
“KROP fahe ba sub komité setoriál 4, sub komité setoriál instituisionál prezide husi Xefe Governu, Taur Matan Ruak, sub komité setoriál sosiál, prezide husi Vise Primeira Ministra Armanda Berta, sub komité setoriál infraestrutua prezide husi Vise Primeiru Ministru José Reis no sub komité setoriál ekonómiku prezide husi Ministru Koordenadór Asuntu Ekonómiku, Joaquim Amaral”, relata, Fidelis. Cin
