Ministru Transporte no Komuniksaun (MTK), José Agostinho da Silva, hatete Governu seidauk atu loke fali voo komersiál ho nasaun seluk, tanba Timor-Leste oras ne’e dadauk sei iha hela Estadu Emerjénsia (EE) relasionadu ho pandemia COVID-19.
Governante ne’e salienta ba Timor-oan sira ne’ebé maka iha rai-liur hakarak fila bele halo pedidu de voo.
Governante ne’e hatete nia simu ona pedidu ba voo husi kompania aéreo EuroAtlántico, nia konsidera ida ne’e diak atu bele assegura voo entre Timor-Leste ho nasaun hotu, maibé sei tetu didiak proposta ne’e no haree evolusaun pandemia COVID-19 iha mundu, inklui Timor-Leste.
“Se kuandu voo komersial signifika katak ema tama nadodon mai, se hanesan ne’e sa ida maka ita tenke halo. Kuandu iha nesesidade ruma ita bele halo flight request atu nune’e ita bele kontrola ita sira hatene ita nia kondisaun rai laran, se voo komersial ita tenke haree ba tempu, kuandu iha nesesidade ita halo flight request oinsa maka ita bele mobiliza. Kuandu Comersial flight significa ida ne’e rutinamente, kuandu hanesan ne’e ema ne’e mai hakarak semana ida ne’e ema ne’e nain hira mai. Depois mai iha ne’e ita nia kapasidade akomodasaun ne’e oinsa. Oras ne’e dadauk ita no entidade hotu nia foku oinsa maka atu evita propagasaun COVID-19”, MTK ne’e hafoin Konsellu Ministru, Kuarta (23-09-2020).
Antes ne’e Ministra Negósiu Estranjeiru no Kooperasaun (MNEK), Adalgiza Magno, hatete, nia parte sei diskute ho MTK hodi loke fila-fali voo komersial kada fulan dala ida, hodi fasilita Timor-oan sira iha rai liur fila mai Timor-Leste.
“Ami tenta hela para atu reativa aviaun komersial fulan ida dala ida maibe por exemplu sira ne’ebe maka hatama proposta iha Europa konsegue liu husi Lisboa mai Governu fasilita. Tenta hela se bele reativa fali aviaun komersial fulan ida dala ida ne’e MTK Organiza ida ne’e se posível, entaun ita sei la loke loron-loron, maibe fulan ida dala ida atu, nune’e sira ne’ebé hela dook estagnadu hela iha ne’ebá bele mai fila fali”, dehan MNEK ne’e.
Entretantu pedidu ida husi kompañia aéreo Euroatlantico ekipa téniku husi MTK no MNEK iha loron 21, téniku hasoru malu ona ho parte Euroatlantico, hodi diskute kona-ba asuntu ne’e. Oct
