Deputadu sira iha Parlamentu Nasionál (PN) kinta lejislatura, liu hosi plenária estraórdinaria, fó omenajen ikus ba mate isin, saudozu Faustino dos Santos alias Render Nunca A Não Ser Leva A Cabeça (RENAN SELAC) ne’ebé hakotu ona nia peregrinasaun iha mundu, iha loron 10, fulan Setembru, tinan ne’e.
Parlamentu Nasionál mós fó votus pezár ba eis deputadu II lejislatura hosi partidu UNDERTIM ne’e ho unanimidade, a favór 39, kontra 0 ho abstensaun 0, maibe deputadu balun la marka prezensa.
Iha plenária ne’e, atúal deputadu hotu espresa nia sentimentu triste, tanba saudozu Renan Selac nu’udar asuwain di’ak Timor-Leste nian.
“Saudozu sai hanesan ezemplu ba ita hotu atu banati tuir, ninia sakrísiu, ezistensia no lealdade hodi luta ba rai ida ne’e atu hetan ukun rasik-an, sai lisaun di’ak, liu-liu ba jerasaun foun atu banati tuir, tanba hosi aktu sira ne’e mak ita nu’udar kuda valor patriotizmu no nasionalizmu. Ami mós kapta liafuan murak ne’ebé ita nia asuwain Renan Selac ko’alia iha momentu simu kondekorasaun orden kollar Timor-Leste hosi PR, nia hateten, ‘rai ne’e mak ita nian, iha problema tenke halo díalogu, rai ne’e ami entrega ba imi atu hatutan’ karik ida ne’e nia mensajen ba ita hotu, katak rai ne’e mak ita nian, unidade no diversidade, maske la hanesan, maibe ita ida de’it, karik iha problema bainhira liafuan sala ba malu, díalogu mak solusaun”, hateten Xefe bankada FRETILIN, deputadu Francisco Miranda Branco iha nia intervensaun, Sesta (11/09/2020).
Iha biban hanesan, reprezentante bankada CNRT, Deputada Bendita Moniz Magno, subliña, Saudozu Renan Selac nia kontribuisaun, sei morin nafatin iha istória Timor-Leste nian, hodi jerasaun ba jerasaun kontinua konta no hatutan, katak Renan Selac hanesan asuwuain Timor nian, maske saudozu husik ona mundu ne’e.
“Saudozu nu’udar eroi no veteranu ba libertasaun nasionál, tanba nia dedika nia-an tomak eskluzivamente iha frente armada FALINTIL, sein interupsaun durante tinan 24, iha luta guerilla nian.
“Ita hotu hakfodak, no triste tanba Kinta-Feira 10 de Setembro saudozu Renan Selac husik ona ita hotu. Ami hotu bankada CNRT hakru’uk hodi rekoñese saudozu nia luta hasoru okupasaun Indonézia iha tinan 1975. Ba saudozu nia aten-barani no determinasaun, sei morin nafatin iha istória Timor-Leste nian”, afirma deputada CNRT ne’e.
Alende ne’e, Xefe bankada PLP, deputadu Cornelio Gama alias L7 husu harohan ba matebian, atu fó neon malirin, atu polítiku sira no ukun nain sira, bele ukun rai ne’e ho loloos, nune’e labele halo terus tan povu.
“Rai ne’e sira husik ona ba ita sira sei moris ne’e, tanba ne’e husu ba partidu hotu-hotu, hadomi malu ba, polítiku sira, ita labele estraga tan nasaun ne’e, FALINTIL 24 anos barak sei moris, matan sei nakloke hela, kaixa klandestina sira mós sei moris matan sei nakloke hela, inan-aman sira sei moris, saida mak ita atu halo di’ak ba nasaun ida”, realsa L7.
Nune’e Xefe bankada PD, deputadu António da Conceição “Kalohan” reforsa tan, enkoraja familia saudozu, atu forsa nafatin, hodi kontinua luta iha mundu ne’e.
“Independensia nu’udar obra ne’e labele apaga hosi saudozu hamutuk ho saudozu sira seluk no mártir sira ne’ebé hakat ona ba mundu seluk, husik hela ba jerasaun foun Timor-Leste.
Bankada PD hakru’uk hodi hananu nafatin obra lulik ne’ebé aman sira husik ona, bankada PD mós agradese hodi hakotu lia atu hatutan obra ne’ebé saudozu, eroi no mártir da pátria sira hotu husik ona”, salienta Kalohan.
Saudozu Renan Selac moris iha Lautem, loron 1, fulan Maiu, tinan 1957, no saudozu Renan Selac, hakotu iis iha Hospital Nacional Guido Valadares, iha loron 10, fulan Setembru ne’e, hafoin hetan atakasaun fuan, iha loron 1, fulan Setembru ne’e, iha nia rezidensia Lospalos.
Enkuantu dadaun ne’e, mate isin lori hikas ba nia horik fatin munisípiu Lautem, hafoin termina omenajen ikus iha Parlamentu nasionál no sei haloot iha jardim dos herois Metinaro. Say
