Deputadu bankada PD, Mariano Assanami Sabino, ezije ba Governu Timor-Leste (TL) atu proteje Timor-oan iha rai-liur, liu-liu estudante sira iha Israel ne’ebé risku ba transmisaun COVID-19. Governu tenke hola medidas ho sériu, hodi salva sidadaun hirak ne’ebé nia vida ameasadu hela.
Assanami hato’o kestaun ne’e, tanba estudante nain 72 ne’ebé Ministériu Agrikultura no Peska (MAP) haruka ba tuir formasaun iha Israel ne’e, ida pozitivu ona COVID-19 no seluk iha risku nia-laran no númeru COVID-19 iha Israel kontinua aumenta.
“Nasaun ne’e trata nia sidadaun ne’e hanesan ema, ita luta ba ukun aan ne’e para atu garante ita nia direitu. Ita haruka ka fasilita ema ba rai-liur ne’e singifika rekursu ne’e importante ba ita, ita labele husik fali rekursu ne’e atu kona moras tiha para depois mai ita atu uza oinsa, ita tenke proteje sira. Sidadaun iha hela iha rai ne’ebé de’it tenke moris seguru, labele hanesan iha ospitál iha Bali ne’ebé sempre rona dehan ema la fó han ba sira, ne’e hanesan ita husik ita nia ema ne’e ba tiha rai-liur, depois hanesan inan-aman laiha, nasaun ne’e laiha ba sira”, Deputadu bankada PD ne’e ba GMN iha Parlamentu Nasionál (PN), Tersa (22/09/2020).
Enkuantu liu hosi mensajen ne’ebé GMN asesu hosi formandu 72 ne’e, rejeita ho deklarasaun Ministra Negósiu Estranjéiru no Kooperasaun (MNEK) Adalgiza Magno, ne’ebé hateten iha PN katak, estudante hirak ne’e labele hetan subsídiu, tanba sira kategória bolseiru ne’ebé fulan-fulan hetan osan husi Governu.
Tuir formandu hirak ne’e, Governu halo de’it akordu, maibé buat hotu sira rasik mak fasilita hanesan osan sosa billete aviaun, hela fatin no ai-han durante ne’e, inklui osan ba formasaun ni’an.
Formandu sira ne’e ba tuir formasaun agrikultura avansadu, iha tinan 2019, nu’udár polítika MAP ni’an. Say
