Deputadu bankada PLP, Sabino Soares “Guntur”, konsidera, Governu aprezenta relatóriu hanesan halo Tik Tok, tanba relatóriu eskrita kona-bá ezekusaun orsamentu ba tinan 2020 no fundu COVID-19 ba Parlamentu Nasionál (PN) la kondis ho Ministru Finansas (MF), Fernando Hanjam halo esplikasaun ba deputadu sira.
“Ha’u koalia hanesan ne’e, ami husu perguntas ou esplikasaun ministru sira halo fali Tik Tok la uniforma relatóriu eskrita orsamentu prevé ba planu no programa Governu ni’an, pelumenus dadus tenke iha kualidade la’ós kuantidade, ami nafatin iha dúvidas, la klaru”, Deputadu bankada PLP ne’e liu liu husi nia intervensaun iha plenária, Segunda (21-09-2020).
Reprezentante povu ne’e husu mós ba Governu atu klarifika mós dadus estudante no agregadu familiár hira mak halo ona pagamentu no hira mak seidauk.
“Foin la-lais ita nia sidadaun sira atu hetan subsídiu hola malu rame-rame mak la konsege identifika dramátiku, ita transfere tiha ona osan tenke klaru, labele dehan item-item to’o 100 ho 200, maibé nia naran laiha, maske to’o ohin loron seidauk finaliza verifikasaun dadus, bainhira mak atu finaliza no rezolve“, dehan Guntur.
MF, Fernando Hanjam, klarifika, Governu rejista preokupasaun ne’ebé deputadu sira hato’o, maibé Governu halo relatóriu bazeia ba programa ne’ebé hatur ona iha sistema.
“Relatóriu tenke kualidade no kuantidade, relatóriu ne’ebé ami aprezenta ba kona-bá fundu COVID-19 programa ne’ebé ami estabelese iha programa tolu ho nia kamentasaun orsamentu, programa ne’ebé Governu estabelese ita hatur iha Sistema, ita halo ita nia relatóriu bazeia ba programa sira ne’ebé hatur ona sistema“, informa Governante ne’e.
Maske nune’e, Governante ne’e rejista preokupasaun deputadu sira ni’an ne’ebé mak hato’o ba Governu.
Enkuantu, PN aprova proposta lei kona-bá autorizasaun ba transferénsia estraordinária daruak husi Fundu Petrolíferu (FP) ho montante USD tokon 286.8. ety
