Primeiru Ministru (PM), Taur Matan Ruak husu, sidadaun hotu iha obrigasaun atu kumpri medidas ne’ebe Ministériu Saúde (MS) fó sai ona, tamba ne’e povu Timor-Leste (TL), atu fó kontribuisaun hodi evita COVID-19 hadaet mai rai laran.
“Buat ne’ebé Governu halo hodi kumpri nia misaun no dever atu alerta hodi tau matan ba sidadaun hotu, naturalmente ita haree moto Ministériu Saúde (MS) nian saúde iha ita nia liman rasik, tamba ne’e sidadaun sira hotu iha obrigasaun, atu fó kontribuisaun,” dehan, Primeiru Ministru, Taur Matan Ruak, iha edifisiu Ministériu Interior, Sesta (04/09/2020).
Xefi Governu ne’e esplika, kontribuisaun ne’ebé sidadaun sira kumpri medidas sanitaria ne’ebé, MS no Organizaun Mundial Saúde fó sai, karik la halo tuir ida ne’e, moras ne’e mai primeiru kona uluk sidadaun ne’ebé mak la kontrola nia-an, segundu mak hadaet ba familia no ikus hadaet ba sosiedade.
“Ami kumpri ami nia parte ami espera katak, sidadaun sira mos kumpri sira nia parte, tamba moras ne’e moras ne’ebé la diak,” tenik, PM Taur.
Ho tulun husi Maromak, maske moras ne’e akontese iha TL, bele konsege rekoperadu hotu, hela nain ida mak sei ativu.
“Tamba ne’e hanesan baibain ha’u dehan, ita labele kanta lai vitoria, tamba moras ne’e sei la’o,” afirma, Xefi Governu.
Lider Ezekutivu ne’e, apela ba inan-aman no sidadaun hotu atu kontinua tau atensaun, tamba TL seida’uk iha vasina.
“Ha’u apela nafatin ba inan aman, joven no sidadaun hotu atu tau atensaun, ne’e laos buat foun ida, enkuantu ita seida’uk hetan vasina iha ita nia rai, entaun ita tenki tau atensaun makas, ha’u espera katak ita labele kona moras ida ne’e,” subliña, PM Taur.
Xefi Governu ne’e hatutan, bainhira to’o momentu ida situasaun obriga, tau medida drastika, hodi salva ema barak nia vida, Governu sei halo ida ne’e.
“Ha’u nia pozisaun mak ida ne’e, karik to’o momentu ida situasaun obriga, tau medida drastika, hodi salva ema barak ita sei halo ida ne’e, soke agora seida’uk,” afirma, Xefi Governu ne’e.
PM Taur informa liu tan, haree notisia iha nasaun Indonezia moras ne’e sae makas, dadaun ne’e iha Indonezia exemplu, se mak la uza maskara hetan kastigu rua, ida toba iha kaisaun laran minutu ida, no seluk selu dollar USD 17, ida ne’e sira senti katak, grave no la halimar tamba numeru moras no mate aumenta.Cin
